سری لنکا میں کورونا وبا کے پیش نظر جیلوں میں بھیڑ بھاڑ کو کم کرنے کے لئے معمولی جرائم میں قصوروار ٹھہرائے گئے 606 قیدیوں کو معافی دی جائے گی۔ مقامی میڈیا نے پیر کو یہ اطلاع دی۔
جیل سپرنٹنڈنٹ جنرل تشار اپل دینیا نے بتایا کہ 65 سال سے زیادہ عمر کے قیدیوں، جن مجرموں نے معمولی جرائم کے لئے اپنی سزا کی آدھی مدت پورے کرچکے ہیں اور جن قصورواروں کے عمرقید کی سزا پچیس سال سے زیادہ ہوچکی ہے وہ بھی عام معافی کے اہل ہیں۔
انہوں نے بتایا کہ جن لوگوں کو معمولی جرائم کے لئے قصوروار قرار دیا گیا ہے اور جرمانہ نہیں بھرنے کی وجہ سے جیل میں قید ہیں ان سبھی کو رہا کیا جائے گا۔
وہیں جیل ریفارم اورقیدیوں کے بازآبادکاری کے وزیر مملکت سدرشنی فرناڈو پلے نے بتایا کہ ڈرگ اسمگلنگ، آبروریزی اور بچوں کے جنسی استحصال جیسے سنگین جرائم مییں قصوروار ٹھہرائے گئے قیدیوں کو رہا نہیں کیا جائے گا۔ واضح رہے کہ سری لنکا میں اب تک 1,000 قیدی کورونا وائرس سے متاثر پائے گئے ہیں۔
