ایران کے وزارت صحت کا کہنا ہے کہ اب تک 14 ایرانی طبی عملے کے عہدیدار کرونا وائرس سے متاثر ہو چکے ہیں۔
ایرانی میڈیا نے بتایا کہ شمالی صوبے کیلان میں ایرانی وزیر صحت کے مندوب محمد حسین قربانی کا کہنا ہے کہ اگر لوگوں نے گھر میں رہنے کے حوالے سے حکام کے مطالبے کی پاسداری نہ کی تو وہ انہیں طاقت کے زور پر اس پر عمل کرانے کے لیے مجبور ہو سکتے ہیں۔
ایرانی وزارت صحت کے ترجمان کیانوش جہانپور نے سرکاری ٹیلی وژن پر نشر ہونے والی ایک پریس کانفرنس میں اعلان کیا کہ ایران میں اب تک کرونا وائرس سے 124 افراد ہلاک ہو چکے ہیں۔ ان کے علاوہ ملک میں کرونا کے تصدیق شدہ کیسز کی تعداد 4747 تک پہنچ گئی ہے۔
جہانپور کے مطابق اب ملک کے تمام 31 صوبوں میں کورونا وائرس کے متاثرین موجود ہے۔
واضح رہے کہ فی الحال دنیا بھر میں تقریبا ایک لاکھ افراد کورونا وائرس سے متاثر ہوئے ہیں۔ اور 34 سو افراد ہلاک ہو چکے ہیں۔
