افغانستان کے لیے امریکہ کے خصوصی ایلچی زلمے خلیل زاد نے استعفی دیا

امریکی وزیر خارجہ انتونی بلنکن نے کہا کہ افغانستان کے لیے امریکی خصوصی ایلچی زلمے خلیل زاد نے استعفیٰ دے دیا ہے اور ان کی جگہ ان کے جونیئر تھامس ویسٹ ہوں گے۔ خلیل زاد نے امریکہ اور طالبان کے درمیان امن مذاکرات میں اہم کردار ادا کیا ہے۔

افغانستان سے امریکی فوجوں کی واپسی کو ابھی دو مہینے سے کم ہی وقت ہوا اور اسی دوران افغانستان کے لیے امریکہ کے خصوصی ایلچی زلمے خلیل زاد نے اپنے عہدے سے استعفی دے دیا۔

زلمے خلیل زاد کی جگہ ان کے جونیئر تھامس ویسٹ کو افغانستان کے لیے امریکہ کا نیا خصوصی ایلچی بنایا گیا ہے۔ اس بات کا اعلان امریکی وزیر خارجہ انتونی بلنکن نے کیا ہے۔

بلنکن نے ٹویٹ کرکے کہا ’’ کئی دہائیوں تک بغیر تھکے امریکہ کی خدمت کرنے کے لیے زلمے خلیل زاد کا شکریہ اور افغانستان کے لیے امریکہ کے خصوصی ایلچی تھامس ویسٹ کا خیر مقدم کرتے ہیں۔

بشکریہ ٹویٹر

انہوں نے کہا کہ ویسٹ نے اس وقت کی جو بائیڈن کی قومی سلامتی ٹیم کے رکن اور قومی سلامتی کونسل کے ملازم کی حیثیت سے خدمات انجام دیں۔ ویسٹ سفارتی کوششوں کی قیادت کریں گے ، جنوبی اور وسطی ایشیائی امور کے بیورو کے سیکرٹری اور اسسٹنٹ سیکرٹری کو مشورہ دیں گے اور افغانستان میں امریکی مفادات کے حوالے سے دوحہ میں افغانستان کے لیے امریکی سفارت خانے کے ساتھ قریبی رابطہ قائم کریں گے۔

وہیں خلیل زاد نے پیر کو اپنے استعفی نامے میں لکھا تھا کہ افغانستان کی حکومت اور طالبان کے درمیان سیاسی معاہدہ جیسا کہ تصور کیا گیا تھا ویسے آگے نہیں بڑھا۔ میرے استعفیٰ کی یہ بھی ایک وجہ ہے اور میں سرکاری ملازمت چھوڑنے کے بعد آنے والے دنوں اور ہفتوں میں اپنے خیالات کا اظہار کروں گا‘‘۔

انہوں نے کہا کہ ہم افغانستان کے بارے میں اپنی پالیسی کے ایک نئے مرحلے میں داخل ہو رہے ہیں اور انہوں نے استعفی دینے کے لیے یہ مناسب وقت منتخب کیا ہے۔ وہ افغانستان کے لوگوں کی تکالیف سے دکھی ہیں۔

واضح رہے کہ زلمے خلیل زاد نے ستمبر 2018 سے ڈونلڈ ٹرمپ اور جوبائیڈن دونوں انتظامیہ کے تحت افغان مفاہمت کے خصوصی ایلچی کی حیثیت سے خدمات انجام دیں۔ اس وقت کے سیکریٹری آف اسٹیٹ مائیک پومپیو، انہیں طالبان اور افغان حکومت کے ساتھ مذاکرات کی قیادت کے لیے لے آئے تھے۔

خلیل زاد نے امریکہ اور طالبان کے درمیان امن مذاکرات میں اہم کردار ادا کیا ہے

زلمے خلیل زاد افغان باشندے ہیں اور وہ امریکا اور طالبان کے مابین طاقت کی تقسیم کا معاہدہ کرنے میں ناکام رہے تھے لیکن انہوں نے فروری 2020 میں طالبان کے ساتھ ایک امریکی معاہدے پر بات چیت کی جو بالآخر امریکا کی طویل ترین جنگ کے خاتمے کا باعث بنی۔