جو بائیڈن نے منگل کے روز کہا ہے کہ امریکی صدارتی انتخابات میں ڈونلڈ ٹرمپ کا شکست تسلیم کرنے سے انکار کرنا ایک شرمندگی ہے۔
ولیمنگٹن کے ڈیلاوئر سے خطاب کرتے ہوئے بائیڈن نے کہا کہ "میں صرف یہ سمجھتا ہوں کہ یہ ایک شرمندگی ہے، بالکل واضح طور پر، صرف ایک ہی چیز جو مجھے محسوس ہوتی ہے وہ یہ کہ اس سے صدر کی میراث کو کوئی فائدہ نہیں ہوگا''۔
انہوں نے مزید کہا کہ وہ ان لوگوں کے نقصان کے احساس کو سمجھتے ہیں جنہوں نے ٹرمپ کو ووٹ دیا اور مزید کہا کہ ان میں سے اکثریت لوگ چاہتے ہیں کہ ملک متحد ہو۔
بائیڈن نے کہا کہ "مجھے لگتا ہے کہ وہ سمجھتے ہیں کہ ہمیں متحد ہونا پڑے گا۔ مجھے لگتا ہے کہ وہ متحد ہونے کے لئے تیار ہیں اور مجھے یقین ہے کہ ہم اس ملک کو اس تلخ سیاست سے نکال سکتے ہیں جو ہم نے گذشتہ 5،6،7 سالوں سے دیکھا ہے۔"
صدر کے خلاف قانونی کارروائی کے بارے میں پوچھے جانے پر سابق نائب صدر نے کہا کہ "مجھے قانونی کارروائی کی ضرورت نہیں دکھائی دیتی ہے۔''
واضح ہو کہ ڈونلڈ ٹرمپ نے اپنے ایک ٹویٹ میں ایک بار پھر انتخابات کو جعلی قرار دیا ہے۔ انہوں نے لکھا کہ 'لوگ اس الیکشن کو کبھی قبول نہیں کریں گے'۔ انتخابی نتائج کا انکشاف ہوتے ہی ٹرمپ نے واضح کر دیا ہے کہ وہ ان کو قبول نہیں کریں گے اور انہیں عدالت میں چیلنج کریں گے۔ ٹرمپ مہم نے قانونی جنگ کیلئے فنڈ اکٹھا کرنے کی مہم بھی شروع کردی ہے۔
