کورونا وائرس کے سبب ریاستوں میں لاک ڈاؤن غیر آئینی: ٹرمپ

ٹرمپ نے جمعرات کو ٹاؤن ہال کے اجلاس میں کہا کہ 'حقیقت یہ ہے کہ ہم کورونا وائرس پر قابو پانے میں کامیاب رہے ہیں لیکن جو کام دوسری ریاستوں کے گورنرز کر رہے ہیں وہ غیر آئینی ہے، مجھے یقین ہے کہ وہ سیاسی وجوہ کی بنا پر ایسا کر رہے ہیں۔'

امریکی صدر ڈونلڈ ٹرمپ نے ملک کی مختلف ریاستوں میں کورونا وائرس (کووڈ 19) کے پھیلاؤ پر قابو پانے کے لئے متعدد گورنرز کی جانب سے نافذ لاک ڈاؤن کو غیر آئینی قرار دیا ہے۔

ٹرمپ نے یہ بات جمعرات کو ٹاؤن ہال کے اجلاس کے دوران کہی۔ انہوں نے کہا کہ 'حقیقت یہ ہے کہ ہم کورونا وائرس پر قابو پانے میں کامیاب رہے ہیں لیکن جو کام دوسری ریاستوں کے گورنرز کر رہے ہیں، وہ غیر آئینی ہے، مجھے یقین ہے کہ وہ سیاسی وجوہ کی بنا پر ایسا کر رہے ہیں۔'

امریکی صدر نے کہا کہ کورونا سے متاثر ہونے کے باوجود ماسک پہننے کے بارے میں ان کی رائے میں کوئی تبدیلی نہیں آئی ہے۔ وہ اب بھی اس بات پر قائم ہیں کہ لوگ ماسک پہنیں یا نہیں، یہ لوگوں پر چھوڑ دیا جانا چاہئے۔

ادھر صدارتی انتخابات کے لئے ڈیموکریٹک پارٹی کے امیدوار جو بائیڈن نے پولیس کے بجٹ میں کٹوتی کی تجویز کو غلط قرار دیتے ہوئے کہا ہے کہ پولیس کی تعداد زیادہ ہونے سے جرائم میں کمی آئے گی۔

جو بائیڈن نے کہا کہ وہ پولیس افسران کے علاوہ سماجی کارکنوں اور اقلیتی برادری کے لوگوں کے ایک گروپ کو تشکیل دیں گے جو مل کر معاشرتی سطح پر سیکورٹی کی ذمہ داری نبھائیں گے۔

عالمی وبا کورونا وائرس سے بری طرح متاثر امریکہ میں اب تک 79 لاکھ افراد متاثر ہو چکے ہیں اور 2 اعشاریہ 17 لاکھ سے زائد افراد ہلاک ہوچکے ہیں۔