نائیجیریا میں اغوا شدہ 53 مسافروں کو رہا کرایا گیا

نائیجیریا میں رہا کرائے گئے 53 مسافروں میں 20 خواتین، 24 مرد اور نو بچے شامل ہیں۔ حکام نے بتایا کہ ان کے اہل خانہ کے سپرد کرنے سے پہلے سبھی لوگوں کا میڈیکل چیک اپ اور معائنہ کیا جائے گا۔

مغربی افریقی ملک نائیجیریا میں گذشتہ ہفتے کچھ مسلح افراد نے نائجر ریاست کے کنڈو گاؤں میں ایک سرکاری بس پر حملہ کر کے 20 خواتین اور نو بچوں سمیت 53 مسافروں کو اغوا کرلیا تھا۔

نائیجیریا کے وسطی شمال نائجر اسٹیٹ کے گورنر ابوبکر ثانی بیلو نے کہا ہے کہ ریاستی حکومت 14 فروری کو کنڈو گاؤں میں مسلح افراد کے ذریعے اغوا شدہ تمام 53 مسافروں کی رہائی کو محفوظ بنانے میں کامیاب ہوگئی ہے۔

ریاست کے دارالحکومت مینا میں صحافیوں سے خطاب کرتے ہوئے گورنر نے کہا کہ بس مسافروں کو مسلسل بات چیت، مشاورت اور سخت محنت کے بعد رہا کرایا گیا ہے۔

نائیجیریا میں اغوا شدہ 53 مسافروں کو رہا کرایا گیا

انہوں نے مزید بتایا کہ مسافروں کو ان کے اہل خانہ کے سپرد کرنے سے پہلے ان سب کا میڈیکل چیک اپ کیا جائے گا۔

گورنر نے مزید کہا کہ کالج کے طلبا کو بچانے کے لیے ابھی بھی کوششیں جاری ہیں، جنھیں بدھ کے روز اسکول پر حملے کے بعد نامعلوم مسلح افراد کے ایک گروپ نے اغوا کرلیا تھا۔

خیال رہے کہ گذشتہ ہفتے بدھ کے روز 27 طلبا سمیت 42 افراد کو ایک اسکول پر حملہ کرکے مسلح افراد نے اغوا کرلیا تھا اور وہ اب بھی لاپتہ ہیں۔

گورنر کی ترجمان میری نول برجے نے کہا کہ 'گورنمنٹ سائنس کالج کاگارا کے طلبا اب بھی ان اغوا کاروں کے ہاتھ میں ہیں لیکن ان کی رہائی کو یقینی بنانے کے لیے سب کچھ کیا جا رہا ہے'۔

خیال رہے کہ نائیجیریا میں بوکو حرام شدت پسند تنظیم کی جانب سے اس طرح کے واقعات اس سے پہلے بھی انجام دیے گئے ہیں۔

گذشتہ برس دسمبر میں نائیجیریا کے شمالی صوبے کاتسینا میں شدت پسند تنظیم بوکو حرام نے اسکول میں داخل ہوکر تقریباً 400 سے زائد بچوں کا اغواء کرلیا تھا۔

سنہ 2014 میں بوکو حرام تقریبا تین سو طالبات کا اغوا کیا تھا۔