حکومت کے ترجمان اسماعیل مختار عمر نے بتایا کہ الشباب کے پانچوں حملہ آور عسکریت پسندوں سکیورٹی فورس کی کارروائی میں مارے گئے ہیں۔ جنگجوؤں نے لیڈو ساحل پر واقع ایلیٹ ہوٹل پر حملہ کیا تھا۔
اس حملے میں کم از کم 16 افراد ہلاک ہوگئے ہيں۔ اسماعیل مختار عمر نے ایک بیان میں کہا کہ "ہلاک شدگان میں سے پانچ دہشت گرد ہیں اور ایک پولس اہلکارکی دفاعی کارروائی کے دوران موت ہوگئی"۔ دہشت گردوں کے حملے میں وزارت اطلاعات اور دفاع کے دو اعلی عہدیداروں کی بھی موت ہوگئی۔
انہوں نے بتایا کہ اس حملے میں 18 افراد زخمی بھی ہوئے ہیں۔ انہوں نے کہا کہ حملے کی تحقیقات کے احکامات جاری کردیئے گئے ہیں اور اس بات کا بھی پتہ لگایا جارہا ہے کہ الشباب کے جنگجو ایلیٹ ہوٹل میں کیسے داخل ہوئے، جو حال ہی میں سرکاری اہلکاروں کی سہولیات کے لئے بنایا گیا تھا۔ حملے کے فورا بعد ہی سکیورٹی فورس کی ٹیم موقع پر پہنچ گئی اور جوابی کارروائی شروع کردی۔
