ممبئی: سال 2023 میں شاہ رخ خان کی فلموں نے باکس آفس پر خوب کمائی کی اور ان کی فلموں کے جادو نے ناظرین کو متاثر کیا۔ پٹھان، جوان اور ڈنکی کے باکس آفس کلیکشن نے ایک بار پھر ثابت کر دیا کہ شاہ رخ خان باکس آفس کے بادشاہ ہیں۔
شاہ رخ خان نے سال 2018 میں ریلیز ہونے والی فلم زیرو کے فلاپ ہونے کے بعد فلموں سے بریک لے لیا تھا۔ شاہ رخ خان نے یش راج بینر تلے بننے والی فلم پٹھان سے فلم انڈسٹری میں شاندار واپسی کی۔ پٹھان نے 657.5 کروڑ روپے کا مجموعی کلیکشن اور 1000 کروڑ روپے سے زائد کا ورلڈ وائڈ کلیکشن کیا۔ پٹھان کے بعد شاہ رخ خان کی فلم جوان ریلیز ہوئی۔
جنوبی ہند کے ہدایت کار ایٹلی کمار کی ہدایت کاری میں بنی فلم ’جوان‘ باکس آفس پر ’پٹھان‘ سے زیادہ کامیاب رہی۔ شاہ رخ خان فلم جوان میں باپ بیٹے کے ڈبل رول میں نظر آئے تھے۔ جوان نے دنیا بھر میں 1100 کروڑ سے زیادہ کی کمائی کی۔ شاہ رخ خان نے مختلف کرداروں میں اپنی اداکاری سے ثابت کیا کہ 55 سال کی عمر میں بھی وہ ہر انداز میں فٹ اور ہٹ ہیں۔
13 جنوری کو وشال بھاردواج کے بیٹے آسمان بھاردواج کی ہدایت کاری میں بننے والی ملٹی اسٹارر فلم ’کتے‘ ریلیز ہوئی تھی۔اس فلم میں ارجن کپور، کونکنا سین شرما، نصیر الدین شاہ، تبو اور رادھیکا مدن جیسے فنکار نظر آئے تھے۔ فلم کتے باکس آفس پر کوئی کمال نہیں دکھا سکی۔
سال 2023 میں شاہ رخ خان کی فلم پٹھان سے ہٹ فلموں کا آغاز ہوا۔ یوم جمہوریہ کے موقع پر ریلیز ہونے والی فلم پٹھان نے باکس آفس پر خوب کمائی کی، فلم میں شاہ رخ خان کے علاوہ دیپیکا پاڈوکون اور جان ابراہم نے اہم کردار ادا کیے تھے۔ جان ابراہم نے پٹھان میں منفی کردار ادا کیا۔
مزید پڑھھیں:
- بالی ووڈ کنگ کی فلم 'ڈنکی' ریلیز، شاہ رخ نے کہا، ارے یار اب پکچر دیکھنے تو جاؤ۔۔۔
- ایشا گپتا نے اسکائی بلیو گاؤن میں گلیمرس تصاویر شیئر کیں
روہت دھون کی ہدایت کاری میں بننے والی فلم شہزادہ 17 فروری کو ریلیز ہوئی۔ فلم ’شہزادہ‘ الو ارجن کی ’الا ویکنتھا پورملو‘ کا ہندی ریمیک ہے۔ فلم شہزادہ میں کارتک آرین، کیرتی سینن، پریش راول، رونیت رائے اور منیشا کوئرالا مرکزی کردار میں ہیں۔ شہزادہ باکس آفس پر کوئی کمال نہ کر سکی۔ اکشے کمار اور عمران ہاشمی کی فلم سیلفی 24 فروری کو ریلیز ہوئی تھی۔ سیلفی 2019 ملیالم زبان کے کامیڈی ڈرامہ ’ڈرائیونگ لائسنس‘ کا ریمیک ہے۔ سیلفی بھی باکس آفس پر ڈھیر ہوگئی۔
ہولی کے موقع پر رنبیر کپور اور شردھا کپور اسٹارر فلم ’تو جھوٹی میں مکار‘ 8 مارچ کو ریلیز ہوئی۔ لو رنجن کی ہدایت کاری میں بنی ’تو جھوٹی میں مکار‘ نے باکس آفس پر 146 کروڑ روپے کی کمائی کی۔ رانی مکھرجی کی فلم مسز چٹرجی ورسیز ناروے 17 مارچ کو ریلیز ہوئی تھی۔ مسز چٹرجی ورسیز ناروے ایک جذباتی ڈرامہ طرز کی فلم ہے، جس کی کہانی ایک ہندوستانی خاتون کی ناروے کی حکومت کے ساتھ لڑائی کے سچے واقعے پر مبنی ہے۔
مسز چٹرجی ورسیز ناروے میں لیڈ دیپیکا چٹرجی (رانی مکھرجی) اپنے بچوں کی تحویل کے لیے ناروے حکومت سے لڑائی لڑتی ہیں۔ مسز چٹرجی ورسیز ناروے میں رانی مکھرجی کے ساتھ انیربان بھٹاچاریہ اور جم سربھ بھی اہم کرداروں میں ہیں۔ مسز چٹرجی ورسیز ناروے میں رانی مکھرجی کی اداکاری کو سراہا گیا، حالانکہ فلم ناکام ثابت ہوئی۔
فلم ’بھیڑ‘ 24 مارچ کو ریلیز ہوئی تھی۔ انوبھو سنہا کی ہدایت کاری میں بننے والی یہ فلم 2020 میں کورونا کے دوران ہندوستان میں نافذ لاک ڈاؤن کے پس منظر پر مبنی ہے۔ فلم میں راج کمار راؤ، پنکج کپور، بھومی پیڈنیکر، دیا مرزا اور آشوتوش رانا جیسے کئی اداکار شامل ہیں۔ بھیڑ باکس آفس پر کوئی کمال نہیں دکھا سکی۔
اجے دیوگن اور تبو کی سپر ہٹ جوڑی پر مشتمل فلم بھولا 30 مارچ کو ریلیز ہوئی تھی۔ ’بھولا‘ تامل ہٹ فلم ’کیتھی‘ کا ریمیک ہے۔ اجے دیوگن نے ہدایت کاری کے ساتھ ساتھ فلم بھولا میں اداکاری بھی کی، حالانکہ یہ فلم ناظرین کی توقعات کے مطابق ثابت نہیں ہوئی۔ آدتیہ رائے کپور اور مرنال ٹھاکر کی فلم گمراہ 7 اپریل کو ریلیز ہوئی تھی۔ ’گمراہ‘ ایک قتل پر مبنی فلم ہے۔ ’گمراہ‘ تیلگو فلم ’تھڈم‘ کا ہندی ریمیک ہے۔ گمراہ بھی باکس آفس پر ناکام ثابت ہوئی۔
سلمان خان کی انتظار کی جانے والی فلم کسی کا بھائی کسی جان 21 اپریل کو ریلیز ہوئی تھی۔ یہ فلم تامل فلم ویرم کا ریمیک ہے۔ ’کسی کا بھائی کسی کا جان‘ میں سلمان خان کے ساتھ پوجا ہیگڑے، وینکٹیش، بھومیکا چاولہ، راگھو جویال، سدھارتھ نگم، جسی گل، شہناز گل، پلک تیواری جیسے اداکار شامل ہیں۔ فرہاد سامجی کی ہدایت کاری میں بننے والی اس فلم کو ناظرین نے مسترد کر دیا۔
مزید پڑھیں:
- فلم کیرالا اسٹوری کی ریلیز پر پابندی کیلئے جمعیۃ علماء ہند سپریم کورٹ پہنچی
- رانی مکھرجی مردانی 3 میں کام کریں گی
ادا شرما کی فلم ’دی کیرالہ اسٹوری‘ 5 مئی کو ریلیز ہوئی تھی۔’دی کیرالہ اسٹوری‘ میں ادا شرما کی اداکاری کو بہت سراہا گیا تھا۔ اس فلم نے تقریباً 240 کروڑ روپے کا زبردست بزنس کیا۔ فلم دی کیرالہ اسٹوری میں کیرالہ کی 32 ہزار خواتین کے جبری مذہب تبدیل کرنے اور انہیں آئی ایس آئی ایس میں شامل کرنے کی کہانی کو دکھایا گیا ہے۔
وپل امرت لال شاہ کی پروڈیوس کردہ فلم کی ہدایت کاری سدیپتو سین نے کی۔ وکی کوشل اور سارہ علی خان کی ذرا ہٹ کے ذرا بچ کے 2 جون کو ریلیز ہوئی۔ ذرا ہٹ کے ذرا بچ کے نے باکس آفس پر 86 کروڑ روپے کی کمائی کی۔
سال 2023 کی سب سے زیادہ انتظار کی جانے والی فلموں میں شامل جنوبی ہند اسٹار پربھاس، سیف علی خان اور کیرتی سینن اسٹارر آدی پورش،، 16 جون کو ریلیز ہوئی۔ اوم راوت کی ہدایت کاری میں بنی ادی پورش کو کافی تنازعات کا سامنا کرنا پڑا۔ رامائن پر مبنی اس فلم میں پربھاس بھگوان رام کے کردار میں نظر آئے تھے، کیرتی سینن ماں سیتا کے کردار میں اور سیف علی خان راون کے کردار میں نظر آئے تھے۔ بڑے بجٹ میں بنائی گئی، آدی پورش نے ٹکٹ ونڈو پر 147 کروڑ روپے کمائے۔
کارتک آرین اور کیارا اڈوانی کی فلم ستیہ پریم کی کتھا 29 جون کو ریلیز ہوئی تھی۔ ستیہ پریم کی کتھا کو شائقین کا پیار ملا اور فلم نے 80 کروڑ روپے سے زائد کی کمائی کی تھی۔ ودیا بالن کی فلم ’نیت‘ 7 جولائی کو ریلیز ہوئی تھی۔ فلم ’نیت‘ ایک قتل کی پراسرار کہانی ہے جس میں ودیا بالن کے ساتھ رام کپور، نیرج کابی، راہل بوس، شاہانہ گوسوامی، امریتا پوری، دیپانیتا شرما، پراجکتا کوہلی شامل ہیں۔ نیت ٹکٹ کھڑکی پر اچھی کارکردگی نہیں دکھا سکی۔
کرن جوہر کی پروڈیوس اور ڈائریکٹ کردہ راکی اور رانی کی پریم کہانی 28 جولائی کو ریلیز ہوئی تھی۔ کرن جوہر طویل عرصے کے بعد راکی اور رانی کی پریم کہانی کے ذریعے بطور ہدایت کار واپس آئے۔ فلم راکی اور رانی کی پریم کہانی میں رنویر سنگھ، عالیہ بھٹ، دھرمیندر، جیا بچن، شبانہ اعظمی نے مرکزی کردار ادا کیے تھے۔ راکی اور رانی کی پریم کہانی نے باکس آفس پر مجموعی طور پر 150 کروڑ سے زیادہ کا بزنس کیا۔
سنی دیول اور امیشا پٹیل کی جوڑی والی غدر 2 اور اکشے کمار کی او ایم جی 2- گیارہ اگست کو ایک ساتھ ریلیز ہوئیں۔ انیل شرما کی ہدایت کاری میں بننے والی فلم غدر 2 نے باکس آفس پر دھوم مچائی۔ 22 سال کے طویل عرصے کے بعد تارا سنگھ اور سکینہ کی محبت کی کہانی سلور اسکرین پر واپس آئی۔غدر 2 نے باکس آفس پر 525 کروڑ روپے سے زائد کی کمائی کی۔ غدر 2 سال 2001 میں ریلیز ہونے والی فلم ’غدر: ایک پریم کتھا‘ کا سیکوئل ہے۔ غدر 2 میں سنی اور امیشا کے ساتھ اتکرش شرما، منیش وادھوا، سمرت کور، لو سنہا اہم کرداروں میں ہیں۔
اکشے کمار کی فلم اوہ مائی گاڈ 2 (او ایم جی 2) بھی 150 کروڑ روپے کما کر ہٹ ثابت ہوئی۔فلم او ایم جی 2 سال 2012 میں ریلیز ہونے والی سپر ہٹ فلم او ایم جی کا سیکوئل ہے۔ اس فلم میں اکشے کمار، پنکج ترپاٹھی اور یامی گوتم مرکزی کردار میں ہیں۔ او ایم جی 2 کی ہدایت کاری امیت رائے نے کی ہے اور اسے پروڈیوسر اشون وردے کے وایا کام 18 اور جیو اسٹوڈیو نے تیار کیا ہے۔
آیوشمان کھرانہ اور اننیا پانڈے کی فلم ڈریم گرل 2 پچیس اگست کو ریلیز ہوئی۔ ڈریم گرل 2 ایوشمان کھرانہ کی سپرہٹ فلم ڈریم گرل کا سیکوئل ہے۔ ڈریم گرل 2 کو ایکتا آر کپور اور شوبھا کپور نے پروڈیوس کیا ہے اور اسے راج شانڈلیا نے ڈائریکٹ کیا ہے۔ ’ڈریم گرل 2‘ نے بھی ’ڈریم گرل‘ کی طرح ناظرین کو خوب ہنسایا۔ یہ فلم سپرہٹ رہی۔ ڈریم گرل 2 نے ٹکٹ ونڈو پر 105 کروڑ روپے کی کمائی کی۔
یہ بھی پڑھیں:
- باکس آفس پر تیرہویں دن بھی 'جوان' کی بادشاہت قائم
- پٹھان ایک ہزار کروڑ کلب میں شامل ہونے والی 5ویں ہندستانی فلم بنی
شاہ رخ خان کی فلم جوان 7 جولائی کو ریلیز ہوئی جس نے کامیابی کی تاریخ رقم کی۔ پٹھان کے بعد جوان سال 2023 میں شاہ رخ کی دوسری سپر ڈوپر ہٹ فلم ثابت ہوئی۔ جوان میں شاہ رخ خان کے علاوہ وجے سیتھوپتی، سانیا ملہوترا، نین تارا، دیپیکا پاڈوکون، سنیل گروور، ردھی ڈوگرا کے اہم کردار ہیں۔ فلم ’جوان‘ ریڈ چلی انٹرٹینمنٹ کی پیشکش ہے۔ اسے گوری خان نے پروڈیوس کیا ہے اور گورو ورما اس کے شریک پروڈیوس ہیں۔
فکرے فرنچائز کی تیسری فلم ’فُکرے 3‘ 28 ستمبر کو ریلیز ہوئی تھی۔ فلم ’فکرے‘ فرنچائز کا تیسرا سیویل ’فکرے 3‘ بھی پہلے دو حصوں کی طرح سپر ہٹ ثابت ہوئی۔ اس فلم نے ایک بار پھر شائقین کو خوب محظوظ کیا۔فرحان اختر اور رتیش سدھوانی کے پروڈکشن ہاؤس کے بینر تلے بننے والی فلم ’فکرے-3‘ میں ورون شرما، پلکیت سمراٹ، پنکج ترپاٹھی اور ریچا چڈھا نے مرکزی کردار ادا کیے ہیں۔ فلم نے 95 کروڑ روپے سے زیادہ کی کمائی کی۔
اکشے کمار کی فلم مشن رانی گنج 6 اکتوبر کو ریلیز ہوئی تھی لیکن فلم صرف 31 کروڑ کا بزنس ہی کر سکی۔ فلم مشن رانی گنج کان کنی انجینئر جسونت سنگھ گل کی زندگی سے متاثر ہے۔ گل نے 1989 میں رانی گنج کول فیلڈ میں 64 لوگوں کو بچایا تھا۔ فلم میں جسونت سنگھ کا کردار اکشے کمار نے نبھایا ہے۔ یہ فلم ٹینو ڈیسائی نے ڈائریکٹ کی ہے اور اسے پوجا انٹرٹینمنٹ نے پروڈیوس کیا ہے۔ فلم میں اکشے کمار کے علاوہ پرینیتی چوپڑا بھی مرکزی کردار میں ہیں۔
اونیش ایس برجاتیا کی ہدایت کاری میں بننے والی دونوں فلمیں 2 اکتوبر کو ریلیز ہوئیں۔ دونوں فلموں کو راج شری پروڈکشن نے جیو سنیما کے ساتھ مل کر پروڈیوس کیا ہے۔ سنی دیول کے چھوٹے بیٹے راجویر دیول اور بالی ووڈ اداکارہ پونم ڈھلون کی بیٹی پلوما ڈھلون نے فلم دونوں میں ڈیبیو کیا ہے۔ ’دونوں‘ ٹکٹ کھڑکی پر بے اثر ثابت ہوئی۔
ٹائیگر شراف، کیرتی سینن اور امیتابھ بچن کی فلم گنپت 20 اکتوبر کو ریلیز ہوئی لیکن شائقین کی کسوٹی پر کھری نہ اتر سکی۔ پوجا انٹرٹینمنٹ گڈ کمپنی کے ساتھ مل کر ’گنپت پارٹ 1‘ کی ہدایت کاری وکاس بہل نے کی ہے۔ فلم کو واشو بھگنانی، جیکی بھگنانی، دیپ شکھا دیش مکھ اور وکاس بہل نے پروڈیوس کیا ہے۔گنپت نے صرف 9 کروڑ کا بزنس کیا۔
ودو ونود چوپڑا کی ہدایت کاری میں بننے والی فلم 12ویں فیل 27 اکتوبر کو ریلیز ہوئی۔ فلم 12ویں فیل میں وکرانت میسی نے مرکزی کردار ادا کیا ہے۔ 12ویں فیل اسٹوڈنٹس لائف پر مبنی فلم ہے، جس میں ان طلباء کی کہانی دکھائی گئی ہے جو آئی اے ایس اور آئی پی ایس بننے کی خواہش کے ساتھ مکھرجی نگر، دہلی آتے ہیں۔
فلم 12ویں فیل کو شائقین کا پیار ملا اور اس نے 57 کروڑ روپے کی کمائی۔ کنگنا رناوت کی فلم تیجس بھی 27 اکتوبر کو ریلیز ہوئی لیکن کوئی کمال نہ دکھا سکی۔فلم تیجس میں کنگنا ایئر فورس کے پائلٹ تیجس گل کے کردار میں ہیں۔ سروش میوارا کی ہدایت کاری میں بننے والی فلم کو رونی اسکریو والا نے پروڈیوس کیا ہے۔
یش راج بینر تلے بننے والی سلمان خان، کیٹرینہ کیف اور عمران ہاشمی کی فلم ٹائیگر 3 بارہ نومبر کو دیوالی کے موقع پر ریلیز ہوئی۔ فلم ٹائیگر 3 کو منیش شرما نے ڈائریکٹ کیا ہے۔ ٹائیگر 3 نے 282 کروڑ روپے کا بزنس کیا۔ یکم دسمبر کو سندیپ ریڈی وانگا کی ہدایت کاری میں بنی فلم اینیمل ریلیز ہوئی۔ فلم اینیمل میں رنبیر کپور، انیل کپور، رشمیکا مندنا، بوبی دیول اور ترپتی ڈمری جیسے اداکاروں نے مرکزی کردار ادا کیے ہیں۔
فلم اینیمل نے باکس آفس پر دھوم مچا ئی۔ اینیمل نے ہندوستانی باکس آفس پر 532 کروڑ روپے سے زائد کی کمائی کی ہے۔ فلم کو بھوشن کمار اور کرشن کمار کی ٹی سیریز، مراد کھیتانی کے سنے ون اسٹوڈیو اور پرنائے ریڈی وانگا کی بھدرکالی پکچرز نے پروڈیوس کیا ہے۔
وکی کوشل کی فلم سیم بہادر یکم دسمبر کو ہی ریلیز ہوئی تھی۔ فلم سیم بہادر ملک کے پہلے فیلڈ مارشل سیم مانیک شا پر بنائی گئی ہے۔ وکی کوشل نے اس فلم میں سام مانیکشا کا کردار ادا کیا ہے۔ سیم بہادر کی ہدایت کاری میگھنا گلزار نے کی ہے۔ سیم بہادر دنیا بھر کے 100 کروڑ کلب میں شامل ہو ئی۔
راجکمار ہیرانی کی ہدایت کاری میں بننے والی فلم ڈنکی 21 دسمبر کو ریلیز ہوئی ہے۔ پٹھان اور جوان کے بعد ڈنکی شاہ رخ خان کی اس سال کی تیسری بڑی فلم ہے۔فلم ڈنکی کو شائقین کی جانب سے اچھا رسپانس مل رہا ہے۔ ڈنکی نے گھریلو باکس میں کھل کر دھوم مچادی ہے۔ چار دنوں میں اس نے باکس آفس پر 100 کروڑ روپے سے زیادہ کی کمائی کی ہے۔ فلم ڈنکی میں شاہ رخ خان کے علاوہ تاپسی پنو، وکی کوشل اور بومن ایرانی بھی اہم کرداروں میں ہیں۔ (یو این آئی)
