حیدرآباد: سلمان خان ان دنوں کافی سرخیوں میں ہیں۔ ایک طرف وہ اپنی فلموں کی شوٹنگ کی وجہ سے سرخیاں بٹور رہے ہیں وہیں دوسری طرف مشہور پنجابی گلوکار سدھو موسے والا کے قتل کے بعد انہیں مل رہے دھمکی آمیز خط سے میڈیا کی توجہ سلمان خان پر ہی مرکوز ہے۔ لیکن اس بار سلمان کے سرخیوں میں آنے کی وجہ ان کی آئندہ فلم ' کبھی عید کبھی دیوالی' ہے۔ دراصل 'کبھی عید کبھی دیوالی' کا نام تبدیل کردیا گیا ہے اور اب اس میں ایک نئے اداکار کو شامل کیا گیا ہے۔ Kabhi Eid Kabhi Diwali Title Changed
میڈیا رپورٹس کے مطابق فلم 'کبھی عید کبھی دیوالی' کا نام بدل کر 'بھائی جان' کر دیا گیا ہے۔ حالانکہ ابھی تک اس کا باضابطہ اعلان نہیں کیا گیا ہے۔ فلم کے نام میں یہ تبدیلی ایسے وقت میں آئی ہے جب سلمان خان کو جان سے مارنے کی دھمکیاں مل رہی ہیں۔ اس سے قبل یہ فلم اس لیے سرخیوں میں آئی تھی کیونکہ سلمان خان کے بہنوئی اور اداکار آیوش شرما نے خود کو اس پروجیکٹ سے علیحیدہ کرلیا تھا۔ جس کے بعد یہ خبر آئی تھی کہ ظہیر اقبال نے بھی یہ فلم چھوڑ دی ہے۔
وہیں بالی ووڈ میں قدم رکھنے والی پنجابی گلوکارہ اور سلمان خان کی دوست شہناز گل نے بھی فلم کرنے سے انکار کردیا ہے۔ حالانکہ شہناز کو فلم کے سیٹ پر دیکھا گیا۔ میڈیا رپورٹس کے مطابق فلم میں بار بار ہونے والی تبدیلیوں کے باعث ان سب نے فلم چھوڑنے کا ذہن بنا لیا ہے۔ دراصل ایوش شرما اور ظہیر اقبال کو سلمان خان کے چھوٹے بھائیوں کا کردار ملا ہے لیکن اس بارے میں کوئی تصدیق نہیں ہوئی ہے۔ اس درمیان خبر آرہی ہے کہ فلم میں ایک اور اداکار اور گلوکار کی انٹری ہوئی ہے جو سلمان خان کے چھوٹے بھائیوں کا کردار ادا کریں گے۔
مزید پڑھیں: Kabhi Eid Kabhi Diwali: دھمکی ملنے کے بعد سلمان خان کی حیدرآباد آمد متوقع
سلمان کے بھائیوں کے کردار کے لیے ٹی وی اداکار سدھارتھ نگم اور پنجابی گلوکار جسی گِل کا نام سامنے آیا ہے۔ سدھارتھ نے فلم دھوم 3 میں عامر خان کے بچپن کا کردار ادا کیا تھا۔ فلم میں ان اداکاروں کے علاوہ راگھو جویال، مالویکا شرما، پوجا ہیگڑے اور وینکٹیش دگوبتی بھی نظر آئیں گے۔
