حیدرآباد: آدی پروش کی ریلیز کی تاریخ جیسے جیسے قریب آرہی ہے، فلم سے متعلق لوگوں کی تجسس و بے تابی میں صرف اور صرف اضافہ ہورہا ہے۔ گزشتہ ماہ میکرز نے فلم کا ٹریلر اور دو گانے۔ جئے شری رام اور رام سیا رام ریلیز کیا تھا۔ آدی پروش کی ٹیم فلم کی ریلیز 16 جون سے 13 دن قبل 6 جون کو فلم کا ایک اور ٹریلر ریلیز کرنے کی تیاری کر رہی ہے۔ Adipurush action trailer
قریبی ذرائع کے مطابق، پربھاس، کریتی سینن، بھوشن کمار، اور اوم راوت سمیت آدی پروش کی ٹیم 6 جون کو تروپتی میں ایک میگا ایونٹ میں فلم کے ایکشن ٹریلر کی نقاب کشائی کرنے کے لیے تیار ہے۔ 6 جون کو آدی پروش کی ٹیم تروپتی میں شائقین اور میڈیا کے سامنے ایک شاندار تقریب میں ایکشن سے بھرپور 2 منٹ، 27 سیکنڈ کا ٹریلر لانچ کرے گی۔ جبکہ فلم کا پہلا ٹریلر شری رام کے جذبات پر مرکوز تھا وہیں دوسرے ٹریلر میں ایکشن مناظر کو دکھایا جائے گا۔ فلم کے دوسرے ٹریلر میں بھگوان رام اور راون کے درمیان تنازع کو دکھایا جائے گا۔
آدی پروش کا ایکشن ٹریلر ریلیز ہوتے ہی فلم کے ریلیز کی الٹی گنتی شروع ہوجائے گی۔ اوم راوت کی ہدایت کاری اور بھوشن کمار کی پروڈیوس کردہ فلم آدی پروش کو ہندوستانی سنیما میں اب تک کی سب سے مہنگی فلم کہا جاتا ہے اور میکرز کو یقین ہے کہ یہ فلم ریلیز ہوتے ہی باکس آفس پر دھوم مچا دے گی۔فلم میں پربھاس نے راگھو کا کردار ادا کیا ہے، جانکی کا کردار کریتی سینن نے ادا کیا ہے۔ سیف علی خان نے لنکیش کا، سنی سنگھ نے لکشمن کا، اور دیودتا ناگے نے بجرنگ کا کردار ادا کیا ہے۔
