مدھیہ پردیش کے اجین میں چائنیز مانجے سے لڑکی کی موت Death of a Girl From Chinese Manjha کے بعد اقلیتی فرقہ کے ایک مانجھا فروش کے تین منزلہ مکان اور دو افراد کی دکانیں منہدم کیے جانے کے معاملے میں بھوپال مرکزی حلقے سے کانگریس رکن اسمبلی عارف مسعود نے اجین انتظامیہ کی کارروائی پر سوال اٹھایا ہے۔
وزیر داخلہ نروتم مشرا نے اس سلسلے میں ایک بار پھر خبردار کیا کہ مدھیہ پردیش میں اگر کوئی چائنیز مانجھا بیچتا پایا جائے گا تو اس پر اجین جیسی ہی کاروائی کی جائے گی۔
وزیر داخلہ نے کہا کہ حکومت پہلے سے ہی چائنیز مانجھے پر پابندی لگا چکی ہے۔ انہوں نے کہا کہ پورے صوبے میں یہ وارننگ دی جا رہی ہے کہ اگر کوئی بھی چائنیز مانجھا بیچتا ہوا پایا گیا تو اس پر سخت سے سخت کارروائی کی جائے گی۔
اجین میں جس طرح سے چائنیز مانجھے کی وجہ سے لڑکی کی موت ہوئی۔ اس پر کانگریس رکن اسمبلی عارف مسعود Arif Masood on Chinese Manjha نے افسوس ظاہر کیا ہے۔
انہوں نے اس واقعہ کو لے کر کی گئی کارروائی کو امتیازی اور غیر منصفانہ قرار دیا ہے۔
عارف مسعود نے وزیر داخلہ کو خط لکھ کر مانجا ساز کے خلاف کاروائی کرنے کی مانگ کی ہے۔ ساتھ ہی پوری ریاست میں اس کے کاروبار پر پابندی لگانے کے مطالبے کو دہرایا۔
عارف مسعود نے وزیر داخلہ کو لکھے خط میں کہا کہ اجین میں چائنا مانجھے کی وجہ سے ایک طالبہ کی موت ہوگئی۔ یہ حادثہ بے حد افسوس ناک ہے۔
انتظامیہ نے مانجا کاروباری عبدالجبار کے تین منزلہ مکان کو توڑ دیا، لیکن انتظامیہ کے ذریعہ اجین سمیت دیگر اضلاع میں چائنیز مانجھا سپلائی کرنے والے بڑے تاجر وکرانت جین جن سے عبدالجبار نے مانجھا خریدنے کے کئی ثبوت بھی دیے، اس کے خلاف کوئی کارروائی نہیں کی گئی۔
عارف مسعود نے وزیرداخلہ سے گزارش کی ہے کہ ریاست میں چائنا مانجھے پر مکمل پابندی کے لیے وکرانت جیسے کلیدی کاروباریوں پر کارروائی کرنی ہوگی۔
ورنہ اس طرح کے واقعات کو دوبارہ ہونے سے انکار نہیں کیا جاسکتا۔ انہوں نے جلد ہی وکرانت جین کے خلاف کارروائی کرنے کا مطالبہ کیا۔
