ادھمپور:محکمہ جل شکتی کے عارضی ملازمین کا احتجاج

ادھم پور میں محکمۂ جل شکتی کے عارضی ملازمین نے اپنے زیرالتواء مطالبات کے پیش نظر حکومت کے خلاف احتجاج کیا۔ ان ملازمین کا کہنا ہے کہ 'ان کی تنخواہوں کے بقایا جات ادا کئے جائیں اور انہیں مستقل کیا جائے'۔

محکمۂ جل شکتی کے عارضی ملازمین نے آج یوٹی انتظامیہ اور مرکزی حکومت کے خلاف احتجاج کیا۔ مظاہرے کی قیادت ان کے سربراہ سومراج نے کی۔ انہوں نے کہا کہ 'وہ کئی برسوں سے اپنے مطالبات کے لیے حکومت کے خلاف احتجاج کرتے آئے ہیں، لیکن ان کے اس احتجاج کا اب تک کوئی اثر نہیں ہوا ہے۔

انہوں نے کہا کہ 'کئی عارضی ملازمین اپنے فرائض انجام دیتے ہوئے ہلاک ہوئے۔ کئی ریٹائر ہوئے لیکن آج تک انہیں مستقل نہیں کیا گیا اور فی الوقت ایسے کئی ملازمین ہیں جن کی مالی حالت اچھی نہیں ہے، لیکن انتظامیہ کی جانب سے اب بھی انہیں وعدوں کے سوا کچھ نہیں ملا۔ انہوں نے کہا کہ 'عارضی ملازمین کی تنخواہ محض چھ ہزار روپے ہے اور اتنے کم پیسوں میں پورے گھر کے اخراجات کیسے ادا ہوں گے، خاندان کی دیکھ بھال کیسے کی جائے ہم لوگ کافی پریشان ہیں'۔

انہوں نے کہا کہ انتظامیہ کو اس بارے میں سوچنا چاہیے، تاکہ وہ عارضی ملازمین جو کئی برسوں سے اپنے مطالبات کے لیے احتجاج کررہے ہیں ان کے مسئلے کا کوئی حل نکلے۔ انہوں نے کہا کہ 'پچھلے 7 برسوں سے کئی عارضی ملازمین کو ان کی تنخواہیں بھی نہیں ملی ہیں۔ انتظامیہ فوری طور پر ان کی تنخواہیں واگزار کرے اور انہیں مستقل کرے، تاکہ ان عارضی ملازمین کو بھی مستقل ملازمین جیسا فائدہ ملے۔