ریاست مہاراشٹر کے پاورلوم صنعتی شہر بھیونڈی کے میونسپل کمشنر ڈاکٹر پروین آشیا نے بھیونڈی شہر میں 12 جولائی تک لاک ڈاؤن کی مدت میں توسیع کردیا ہے۔
کورونا متاثرین کی تعداد میں اضافے کی وجہ سے شہر کو مائکرو کنٹینمنٹ زون کی فہرست میں رکھا گیا ہے جس کی وجہ سے شہر میں صرف دودھ، پھل، کرانہ اور میڈیکل اسٹور کے علاوہ تمام تجارتی مراکز بند رہیں گے۔
واضح رہے کہ بھیونڈی میں تیزی سے پھیل کورونا کی چین کو توڑنے کے لیے کارپوریشن نے 18 جون سے تین جولائی تک 15 دن کے لیے لاک ڈاؤن کرکے شہر کو کنٹینمنٹ زون کی فہرست میں رکھنے کا اعلان کیا تھا۔
کارپوریشن کی جانب سے لاک ڈاؤن کے دوران تمام کاروباری سرگرمیاں تو بند کردی گئیں تھیں لیکن شہریوں کی جانب سے کووِڈ-19 کے ہدایات پر عمل نہ کرنے کے سبب متاثرین کی تعداد میں اضافہ ہوتا رہا جس کے سبب اموات میں بھی اضافہ ہوتا گیا۔
کورونا وائرس سے صحت یاب ہونے کی شرح60 فیصد زائد
گزشتہ تین دنوں سے شہر میں بالترتیب کورونا سے متاثر 82, 82 اور88 نئے کیسز کی تصدیق کی جاچکی ہے، گزشتہ روز 88 نئے مریضوں کے ساتھ شہر میں کورونا سے متاثرہ مریضوں کی مجوعی تعداد دو ہزار ایک سو 11 ہوگئی ہے۔ جس میں 968 مریض صحت یاب بھی ہوئے ہیں لیکن 114مریض اس وبا کے شکار بھی ہوچکے ہیں۔
واضح رہے کہ کنٹینمنٹ زون میں کرانہ کی دکانوں کو صبح 11 بجے سے شام تین بجے تک اور دودھ کی دکانوں کو صبح 8 بجے سے صبح دس بجے تک وہیں شام پانچ بجے سے سات بجے تک کھولنے کی اجازت دی گئی ہے۔
وہیں موٹر کار، ٹیکسی اور آٹو رکشا جیسی گاڑیوں کی غیرضروری آمد و رفت پر پابندی عائد کردی گئی ہے۔ میونسپل کمشنر کے ذریعہ کنٹینمنٹ کے قواعد پر عمل نہ کرنے والوں کے خلاف سخت کاروائی کا حکم دیا گیا ہے۔
