گاندربل:جموں و کشمیر کے ضلع گاندربل میں عالمی یوم صحت کے موقع پر ضلع لیگل سروسز اتھارٹی اور تحصیل لیگل سروس کمیٹی نے چیف میڈیکل آفس گاندربل کے باہمی تعاون سے ضلع ہسپتال میں ایک بیداری پروگرام کا انعقاد کیا، رواں سال کے عنوان ہمارا سیارہ ہماری صحت پر توجہ مرکوز کرتے ہوئے منایا گیا، اس سال کے عنوان کا مقصد ہمارے سیارے اور اس پر رہنے والے لوگوں کی مجموعی بہبود پر عالمی توجہ مرکوز کرنا ہے۔ سیکریٹری ڈسٹرکٹ لیگل سروس اتھارٹی محترمہ تبسم تقریب میں مہمان خصوصی کے طور پر شامل ہوئیں جبکہ وسیم مرزا چیئرمین تحصیل لیگل سروس کمیٹی گاندربل اس موقع پر مہمان ذی وقار تھے۔ تقریب پر ڈاکٹروں کے علاوہ عملہ اور نیم طبی طلبا بھی موجود تھے۔
اس موقع پر سیکریٹری ڈسٹرکٹ لیگل سروس اتھارٹی گاندربل نے عالمی یوم صحت کی اہمیت پر روشنی ڈالتے ہوئے کہا کہ کوئی شخص زیادہ پیسے کے بغیر زندہ رہ سکتا ہے لیکن اچھی صحت کے بغیر زندہ نہیں رہ سکتا، تقریب میں ماحولیات کے تحفظ کا عہد کرنے کی ترغیب دی گئی تاکہ آنے والی نسلوں کے لیے فطرت اور قدرتی وسائل کی ضروریات کی حفاظت کی جا سکے۔
ڈاکٹر افروزہ چیف میڈیکل آفیسر گاندربل نے ان تمام اداروں کے ساتھ عالمی یوم صحت کا افتتاح کیا جو عملی طور پر جڑے ہوئے تھے۔ انہوں نے عالمی دن کے موضوع پر روشنی ڈالی جو کہ ہمارا سیارہ ہماری صحت ہے، انہوں نے کہا کہ صحت صرف جسمانی، روحانی یا ذہنی نہیں ہے بلکہ یہ ہمہ گیر ترقی ہے، مجموعی ترقی تب ممکن ہے جب ہمارا ماحول صاف ستھرا اور محفوظ ہو۔
وسیم مرزا چیئرمین تحصیل لیگل سروسز کمیٹی گاندربل نے کہا کہ ماحول ہماری صحت اور تندرستی پر براہ راست اور بالواسطہ اثر ڈال سکتا ہے، عالمی یوم صحت کا مقصد ہر کسی کو صحت کی مناسب سہولیات فراہم کرنا ہے اور ہمیں خود سے تبدیلی کا آغاز کرنا چاہیے، تھوڑی سی تبدیلی ماحول پر بڑا اثر ڈال سکتی ہے۔
صحت عامہ کے ماہر ڈاکٹر سہیل احمد نے سائنسی پیشکش کے ذریعے اپنا نقطہ نظر پیش کیا اور ورلڈ ہیلتھ آرگنائزیشن WHO کے مطابق صحت کی تعریف پر روشنی ڈالتے ہوئے کہا کہ صحت ایک مکمل جسمانی، ذہنی اور سماجی بہبود کی حالت ہے، ماحولیاتی آلودگی انسانی صحت کے لیے سب سے بڑے خطرات میں سے ایک ہے کیونکہ اس سے سانس کے انفیکشن، دل کی بیماری اور پھیپھڑوں کے کینسر کا خطرہ بڑھ جاتا ہے۔ ہم زیادہ سے زیادہ پودے لگا کر اور قابل تجدید ذرائع استعمال کر کے اپنے ماحول کو صاف کرنے کے لیے ضروری اقدامات کر سکتے ہیں۔ تقریب کے اختتام پر ڈاکٹر نگہت میڈیکل سپرانٹنڈنٹ ڈسٹرکٹ ہسپتال گاندربل نے شکریہ کی تحریک پیش کی۔
