لیفٹیننٹ جنرل پانڈے نے جنگجو مخالف آپریشنز میں لائی جانے والی تیزی پر کہاکہ 'یہاں پچھلے کچھ دنوں سے آپریشنز جاری ہیں۔ یہ آپریشنز انٹیلی جنس اطلاعات پر چلائے جا رہے ہیں۔ میں ان آپریشنز کو حالیہ دنوں میں پیش آنے والے واقعات کے ساتھ کنکٹ نہیں کرنا چاہوں گا'۔
انہوں نے منگل کو یہاں شہرہ آفاق جھیل ڈل کے کناروں پر واقع شیر کشمیر انٹرنیشنل کنونشن کمپلیکس میں منعقدہ ایک تقریب کے حاشئے پر نامہ نگاروں کو بتایاکہ 'پار بیٹھے دشمن عناصر سرحد کے اس پار جنگجو بھیجنے کے اس آخری موقعے سے فائدہ اٹھانا چاہتے ہیں۔ حال ہی میں اوڑی اور رام پور سیکٹروں میں ایسی دو کوششیں ہوئیں۔ ان کوششوں کو نہ صرف ناکام بنایا گیا بلکہ دراندازوں کو بھی مارا گرایا گیا'۔
لیفٹیننٹ جنرل پانڈے نے کہا کہ 'ہم الرٹ ہیں۔ ہم دراندازوں کو سرحد کے اس پار داخل ہونے میں کامیاب نہیں ہونے دیں گے۔ جو دراندازی کرنے میں کامیاب ہوں گے ان کو کشمیری عوام کی مدد سے ہلاک کیا جائے گا'۔
یہ بھی پڑھیں:
ہم نے گوڈسے نہیں، گاندھی کے بھارت سے ہاتھ ملایا تھا: محبوبہ مفتی
ان کا مزید کہنا تھاکہ 'حالیہ دنوں میں شہری ہلاکتیں ہوئی ہیں۔ جانی نقصان کی کوئی برپائی نہیں ہوتی ہے۔ ہمیں یقینی بنانا ہے کہ فرقہ ہم آہنگی قائم رہے'۔
قبل ازیں لیفٹیننٹ جنرل ڈی پی پانڈے نے 300 طلباء کو ہری جھنڈی دکھاکر روانہ کیا جنہیں ملک بھر کی یونیورسٹیز میں مختلف پروگرامز کے تحت اسکالرشپ حاصل ہوئی ہے۔
