جنوبی کشمیر میں ریل سروس بحال

جنوبی کشمیر کے ضلع شوپیاں میں جمعہ کے روز حزب المجاہدین سے وابستہ تین جنگجوؤں کی ہلاکت کے پیش نظر معطل کی جانے والی سری نگر بانہال ریل سروس منگل کے روز بحال ہوئی تاہم شمالی کشمیرمیں ریل سورس حسب معمول جاری تھی۔

ایک ریلوے عہدیدار نے بتایا کہ پولیس کی طرف سے ایک ایڈوائزری موصول ہونے کے بعد پیر کے روز اننت ناگ پارلیمانی حلقے کے تیسرے مرحلے کی پلوامہ اور شوپیاں میں پولنگ کے پیش نظر ریل سروس کو معطل رکھا گیا تھا۔

انہوں نے کہا کہ تاہم پیر کی شام کو ایک تازہ ایڈوائزری موصول ہوئی جس میں کہا گیا کہ ریل سروس کو منگل کے روز بحال کیا جائے۔
انہوں نے کہا کہ منگل کے روز وادی میں ریل سروس حسب معمول جاری رہی۔