وئین پانپور میں کان کنی پر عائد پابندی کو ختم کرنے کا مطالبہ

جموں و کشمیر کے ضلع پلوامہ کے وئین پانپورمیں لوگوں نے کان کنی پر عائد کردہ پابندی کو ختم کرنے کے لیے احتجاجی مظاہرہ کیا۔

ضلع پلوامہ کے وٸین پانپور کے سیکنڑوں لوگوں نے آج زوردار احتجاجی مظاہرہ کیا۔ انہوں نے کہا کہ انتظامیہ کی طرف سے کان کنی پر روک لگانے سے ہزاروں لوگ بے روزگار ہو رہے ہیں۔ یہ مزدور کان کنی کرکے اپنے گھر کا خرچ چلاتے تھے۔

انہوں نے کہا کہ علاقے کی بیشتر آبادی کانوں میں مزدوری سے اپنی ضروریات پوری کرتی ہے لیکن اس کام پر غیر ضروری طور پر پابندی لگا کر کے انہیں پریشان کیا جارہا ہے۔ انہوں نے کہا کہ 'وہ جی ایس ٹی اور رائیلٹی ٹیکس بھی ادا کرتے ہیں لیکن پھر بھی انہیں کام کرنے سے روکا جا رہا ہے۔'

مظاہرین نے کہا انہوں نے اپنی جاٸیداد اور اپنی زمین بیچ کر کان کنی کا کام شروع کیا تھا اور اگر اس کام پر مسلسل بندشیں عائد کی جائیں گی تو ہمیں اپنے گھر کو بیچ کر بینک کا قرضہ ادا کرنا پڑے گا اور ہمارے اہل و عیال فاقہ کشی سے مر جائیں گے۔