محکمہ موسمیات نے آئندہ چند روز کے اندر مزید برفباری کی پیش قیاسی کی ہے۔ محکمہ کے مطابق رواں ماہ کی 14 تاریخ کو دوبارہ بارش اور برفباری ہوگی اور یہ سلسلہ 16 تاریخ تک جاری رہے گا۔ برفباری کے پیش نظر لوگوں سے احتیاط برتنے کو کہا گیا ہے۔
اس دوران 15 اور 16 تاریخ کو موسم سب سے زیادہ خراب رپنے کی پیش قیاسی کی گئی ہے۔
برفباری کے سبب کشمیر میں درجہ حرارت میں کافی گراوٹ دیکھی گئی ہے اور گزشتہ روز سرینگر کا زیادہ سے زیادہ درجہ حرارت چار ڈگری درج کیا گیا۔
ادھر برفباری سے جموں، سرینگر شاہراہ، مغل روڈ اور سونہ مرگ، دراس شاہراہیں بھی مسلسل آمد و رفت کے لیے بند رہیں۔ تاہم زوجیلا، لیہہ سڑک آمد و رفت کے لیے کھلی ہے۔
فی الوقت جموں سرینگر شاہراہ پر جار سو سے زائد مال برداری گاڑیاں درماندہ ہیں۔
گیارہ تاریخ کو وادی کشمیر میں برفباری ہوئی جس سے عام زندگی پوری طرح سے مفلوج ہو گئی۔ وادی کے میوہ باغات کو زبردست نقصان ہوا۔ ہزاروں درخت اکھڑ گئے جبکہ بیشتر باغات میں سیب کے درختوں کی شاخیں ٹوٹ گئیں۔
ادھر پوری وادی میں بجلی کا نظام پوری طرح بحال نہیں کیا گیا ہے۔ کئی علاقوں میں پانی کی سپلائی اور آمد و رفت پر بھی کافی اثر پڑا ہے۔
