جموں و کشمیر کے ضلع پلوامہ کے بنڈزو علاقے میں نامعلوم بندوق بردار نے پولیس اہلکار پر فائرنگ کی Firing on Police Personnel جس میں پولیس اہلکار زخمی ہوگیا۔ زخمی اہلکار کو ہسپتال میں داخل کرایا گیا ہے۔
ایک دیگر پولیس اہلکار نے بتایا کہ بنڈزو پلوامہ کے رہنے والے مشتاق احمد وگے ولد غلام محمد وگے نامی پولیس اہلکار پر نامعلوم بندوق برداروں نے فائرنگ کی۔
انہوں نے کہا کہ مشتاق احمد اس وقت ڈی پی ایل ڈسٹرکٹ پولیس لائنز پلوامہ میں دھوبی کے طور پر اپنے فرائض انجام دے رہا ہے اور ان کی ٹانگ میں گولی لگی ہے۔
مقامی باشندوں نے زخمی پولیس اہلکار کو فوری طور پر ضلع ہسپتال پہنچایا جہاں سے مزید علاج کے لیے انہیں ایس ایم ایچ ایس سرینگر ریفر کردیا گیا ہے۔
فی الحال علاقے کو محاصرے میں لے کر حملہ آور کی تلاش جاری ہے۔
پلوامہ کے ایس ایس پی غلام جیلانی نے اس واقعہ کی تصدیق کرتے ہوئے کہا کہ پولیس اہلکار کی حالت مستحکم ہے۔
