ضلع مجسٹریٹ سرینگر محمد اعجاز اسد نے کہا ہے کہ بغیر ماسک پہنے عوامی مقامات پر گھومنے والے افراد کو مارا اور پیٹا نہیں جا سکتا، تاہم ان کے خلاف قانون کے مطابق کارروائی کی جائے گی۔
ان باتوں کا اظہار ڈی سی سرینگر نے مضافاتی علاقہ ہارون میں ایک سرکاری تقریب کے حاشئے پر نامہ نگاروں کے سوالات کا جواب دیتے ہوئے کیا۔ انہوں نے کہا: ’’بعض ملکوں میں رہنما خطوط پر عمل نہ کرنے والوں کو ڈنڈے سے پیٹا جا رہا ہے۔ ہمارا ملک ایک جمہوری ملک ہے ویسی چیزیں یہاں نہیں ہو سکتی تاہم ایس او پیز کی پاسداری نہ کرنے والے افراد کے خلاف قانون کے مطابق ہی کارروائی ہوگی۔‘‘
قابل ذکر ہے کہ ڈی سی سرینگر نے عوامی مقامات پر بغیر ماسک پہنے افراد کا موقع پر ہی کورونا وائرس ٹیسٹ کیے جانے کے علاوہ جرمانہ عائد کرنے کے احکامات صادر کیے ہیں۔
ڈی سی سرینگر نے لوگوں سے رہنما خطوط پر عمل آوری کرنے خصوصا ماسک پہننے کی تلقین کرتے ہوئے کہا کہ گائیڈ لائنز پر من و عن عمل نہیں ہو رہا ہے جس کے نتیجے میں آئے روز مثبت کیسز کی تعداد میں اضافہ دیکھا جا رہا ہے۔
انہوں نے مزید کہا کہ کورونا وائرس کے پھیلائو کو روکنے کے لیے رہنما خطوط کی پاسداری بے حد ضروری ہے۔
