حکام کا کہنا ہے کہ 'اگست 2019 میں آرٹیکل 370 کی منسوخی کے بعد زمینی صورتحال کے بارے میں معلومات حاصل کرنے کے لیے غیر ملکی سفیروں کا ایک نیا وفد رواں ہفتے جموں و کشمیر کا دورہ کرے گا۔'
واضح رہے کہ گذشتہ ماہ بھارت میں امریکی سفیر سمیت سفیروں کا پہلا وفد جموں و کشمیر کا دورہ کیا تھا۔
ایک عہدیدار نے بتایا کہ 'غیر ملکی سفیروں کا نیا دستہ اس ہفتے کے آخر میں جموں و کشمیر کا دورہ کرے گا۔'
عہدیدار نے بتایا کہ 'نئے وفد میں یورپی یونین اور خلیجی ممالک کے سفیر بھی شامل ہیں۔'
جنوری میں بھارت میں امریکی سفیر کینتھ جسٹر سمیت 15 سفیروں کی ٹیم نے جموں و کشمیر کا دو روزہ دورہ کیا تھا۔
غیر ملکی سفیروں کے اس وفد میں امریکہ، جنوبی کوریا، ویتنام، بنگلہ دیش، مالدیپ، مراکش، فجی، ناروے، فلپائن، ارجنٹینا، پیرو، نائجیریا، ٹوگو اور گیانا کے افراد شامل تھے۔
واضح رہے کہ مرکزی حکومت نے 5 اگست 2019 کو آرٹیکل 370 کو منسوخ کرنے کے بعد ریاست جموں و کشمیر کو جموں و کشمیر اور لداخ میں تقسیم کر کے اسے مرکز کے زیرانتظام قرار دیا تھا۔
