جموں و کشمیر کے ضلع پلوامہ کے ترال کے متعدد دیہی علاقوں میں گزشتہ شام تیز آندھی کے بعد ہوئی شدید ژالہ باری کے سبب چیوہ، چھان کتار، مندورہ، لروجاگیر اور لرگام جیسے علاقوں میں کسان پریشان ہیں، کسانوں کا کہنا ہے کہ شدید ژالہ باری سے کھڑی فصلوں خاص کر سرسوں اور سیب کو زبردست نقصان پہنچا ہے، جس کی وجہ سے کسانوں میں تشویش کی لہر دوڑ گئی ہے۔ Farmers Disturbed by Hailstorm in Tral
اس سلسلے میں آج ہارٹیکلچر ڈویلپمنٹ آفیسر ترال گوہر احمد ڈار کی صدارت میں ایک ٹیم نے کئی علاقوں کا دورہ کیا اور وہاں سیب اور دیگر میوہ جات کو ہوئے نقصانات کا جائزہ لیا، اس موقع پر کسانوں نے اپنی پریشانیاں متعلقہ حکام کے سامنے رکھیں، جب کہ محکمے نے انھیں تعاون فراہم کرنے کی یقین دہانی کرائی۔
میڈیا کے نمائندوں سے بات کرتے ہوئے ہارٹیکلچر ڈویلپمنٹ آفیسر ترال گوہر احمد نے بتایا کہ میوہ جات کو دس فیصد نقصان سے دوچار ہونا پڑا ہے اور کسانوں کو ضروری ہدایات بھی جاری کی گئی ہیں اور امید ہے کہ اس نقصان کی بھرپائی ہو گی۔ واضح رہے کہ ترال میں گزشتہ دنوں میں یہ تیسری ژالہ باری ہے۔
