گاندربل میں بی جے پی کا اجلاس، متعدد نوجوان پارٹی میں شامل

بھارتیہ جنتا پارٹی (بی جے پی) کی جانب سے آج گاندربل کے ٹاؤن ہال میں ایک اجلاس منعقد کیا گیا۔ اجلاس کے دوران متعدد مقامی نوجوانوں نے بی جے پی میں شمولیت اختیار کرلی جب کہ انہوں نے بی جے پی میں شامل ہونے کو خوش قسمتی سے تعبیر کیا۔

گاندربل کے ٹاؤن ہال میں بی جے پی کی جانب سے ایک رنگا رنگ تقریب کا انعقاد کیا گیا جہاں میونسپل کونسلر عبدالمجید میر، انجینیئر اعجاز احمد راتھر اور ضلع کے متعدد نوجوانوں نے جموں و کشمیر بی جے پی کے جنرل سکریٹری اشوک کول، ضلعی صدر غلام حسن راتھر اور دیگر رہنماؤں کی موجودگی میں بھاجپا میں شمولیت اختیار کرلی۔

اس موقع پر اشوک کول نے ان نوجوانوں کا پارٹی میں خیرمقدم کیا۔ انہوں نے کہا کہ یہ نوجوان جموں و کشمیر میں پارٹی کو مضبوط بنانے میں اہم کردار ادا کریں گے۔ اجلاس سے خطاب کرتے ہوئے اشوک کول نے پاکستان کو تنقید کا نشانہ بنایا اور ملک کی ترقی کے لیے وزیراعظم نریندر مودی کی خدمات کی ستائش کی۔