مرکزی زیرانتظام علاقے کی گرمائی راجدھانی سرینگر کے پارمپورہ پولیس سٹیشن کی جانب سے چوروں کے خلاف بڑی کاروائی کی گئی جس میں 22 لاکھ روپئے مالیتی سونے کے زیورات اور 3 لاکھ روپئے نقد رقم کو ضبط کیا گیا اور 10 افراد کو چوری کی الزام میں گرفتار کرلیا گیا۔
پارمپورہ ایس پی پربیت سنگھ نے پریس کانفرنس میں میڈیا کے نمائندوں کو بتایا کہ گذشتہ 26 مئی کو ملورہ علاقے میں ایک چوری کی واردات پیش آئی تھی جس کی تھانہ پارمپورہ میں شکایت موصول ہوئی تھی۔ شکایت میں بتایا گیا تھا کہ ’چند نامعلوم افراد نے گھر کی تلاشی کا بہانا بناکر جعلی بندوق کی نوک پر گھر میں رکھے سامان کو لوٹ لیا۔ ایس پی نے بتایا کہ ایچ ایم ٹی سے بھی اسی طرح کی ایک اور شکایت وصول ہوئی تھی، جس کے بعد تحقیقات کا آغاز کیا گیا۔
یہ بھی پڑھیں: کولگام کے کھڈونی علاقے میں ہڑتال
انہوں نے بتایا کہ تحقیقات کے دوران کچھ مشکوک افراد کو گرفتار کرکے تفتیش کی گئی جس میں انہوں نے جرم کا اعتراف کرلیا۔ چوری کی واردات میں ملوث 10 افراد کو گرفتار کرلیا گیا اور ان کے قبضہ سے تقریباً 22 لاکھ روپئے مالیت کا سونا، 3 لاکھ روپئے نقد اور ایک گاڑی کو ضبط کرلیا گیا۔ پربیت سنگھ نے پولیس ٹیم کی ستائش کی۔
