پولیس کے مطابق ملزم بہو نے گھریلو تنازع کے سبب ساس کا گلا دباکر قتل کیا تھا۔
کوتوالی کے علاقہ گاؤں ساکھن خورد کی ساکن بزرگ خاتون سویتا کی لاش تین ماہ قبل اپنے ہی گھر کی چھت پر پڑی ہوئی ملی تھی۔
متوفی خاتون کے بیٹے نے گاؤں کے کچھ افراد پر دشمنی کی وجہ سے اس کی ماں کا قتل کرنے کا الزام عائد کیا۔
پولیس نے مقدمہ درج کرکے ملزمین کوحراست میں لے لیا۔
پولیس نے کئی روز تک تفتیش کی لیکن پولیس تفتیش کا رخ شروع سے ہی متوفی خاتون کے بیٹے اور بہو کی طرف ہو رہا تھا، جمعہ کے روز پولیس نے قتل کے معاملہ کا پردہ فاش کرتے ہوئے متوفی خاتون کے بیٹے اور اس کی بیوی پوجا سینی کو حراست میں لے لیا۔
پوچھ تاچھ کے دوران خاتون نے قتل کرنے کا جرم قبول کرتے ہوئے بتایا کہ اس نے گھریلو تنازع کے سبب اپنی ساس کا گلا دباکر اس کا قتل کیا تھا۔
انسپکٹر سنجے سنگھ نے بتایا کہ ملزم خاتون کا اپنی ساس سے جھگڑا ہوا تھا، جس کی وجہ سے اس نے اپنی ساس کو گلا دبا کر قتل کردیا تھا۔ پھر اس کی لاش کو چھت پر پھینک دیا۔
وہیں پولیس کے ذریعہ معاملہ کا پردہ فاش کرنے کے بعد حراست میں لئے گئے گاؤں کے شخص کو چھوڑ دیا گیا۔
جمعہ کے روز کوتوالی میں پریس کانفرنس کے دوران ملزم خاتون پوجا سینی میڈیا کے کسی سوالوں کا جواب نہیں دے سکی اور اس نے خاموشی اختیار کرلی، جس کے بعد ساری بات پولیس نے ہی میڈیا کے سامنے رکھی۔
