خاتون کے قتل میں نامزد تین ملزمان گرفتار

حال ہی میں رات کے وقت گاؤں بھینسا راؤ میں خاتون کویتا زوجہ دنیش کی لاش درخت سے لٹکی ہوئی ملی تھی آج تھانہ فتح پورپولیس نے اس قتل کا پردہ فاش کرتے ہوئے تین ملزمان کواسلحہ کے ساتھ گرفتار کرکے جیل بھیج دیا ہے۔

تفصیل کے مطابق حال ہی میں یوپی کے ضلع سہارنپور کے علاقہ فتح پور تھانہ کے گاؤں بھینسہ راؤ میں ایک خاتون کویتا زوجہ دنیش کی لاش درخت سے لٹکی ہوئی ملی تھی۔

جس کا مقدمہ اس کے بھائی پروین کمار کے ذریعہ تھانہ میں درج کرایا گیا تھا اور اسی گاؤں کے تین افراد پر قتل کا الزام عائد کیا گیا تھا۔

پولیس نے مقدمہ درج ہونے کے بعد تفتیش شروع کردی اورنامزد ملزمان کو گرفتار کرنے کے لئے پوچھ تاچھ شروع کردی۔

آج صبح تقریباً ساڑھے آٹھ بجے تھانہ فتح پور انچارج ستیندر ناگر نے اپنی پولیس ٹیم کے ساتھ تینوں قاتل سونم ولد رمیش، دیپک ولد نریش اور ابھیشیک ساکن بھینسا راؤ کو گاؤں کے نزدیک سے گرفتار کرلیا۔

پولیس نے ملزمان کے قبضہ سے دو چاقو، ایک دیسی طمانچہ دو زندہ کارتوس برآمد کئے ہیں۔

پولیس کا اس قتل کے معاملے میں کہنا ہے کہ گرفتار دیپک مقتول کے گھر آتا جاتا تھا اور دونوں کے ناجائز تعلقات تھے ۔ اس قتل کی وجہ ناجائز تعلقات ہے۔