ریاست اترپردیش کے ضلع سہارنپور کے گاؤں سہجوی میں واقع جونیئر ہائی اسکول میں وقت پر نہ پہنچنے سے ہیڈ ماسٹر نے ایک ٹیچر کی غیر حاضری لگا دی، جس کے بعد اس ٹیچر نے اے بی ایس اے کو شکایت کی۔
اے بی ایس اے نے اسکول پہنچ کر غیر حاضری کو ختم کرکے حاضری لگا دیا، جس کے بعد ہیڈ ماسٹر نے ٹیچر اور اے بی ایس اے پر نازیبا الفاظ کے استعمال کرنے کا الزام عائد کیا اور اے بی ایس اے اور ٹیچر کے خلاف ایس سی ایس ٹی ایکٹ کے تحت مقدمہ درج کرایا ہے۔
تفصیلات کے مطابق جونیئر ہائی اسکول کے ہیڈ ماسٹر سریندر کمار نے اسکول ٹیچر پوجا تومر اور اے بی ایس اے پربھات کمار کے خلاف ایس سی ایس ٹی ایکٹ سمیت سنگین دفعات میں تھانہ رامپور منیہاران میں مقدمہ درج کرایا ہے۔
اس سلسلے میں ہیڈ ماسٹر سریندر کمار نے بتایا کہ اسکول میں تعینات پوجا تومر وقت پر اسکول نہیں آتی ہیں اور وقت سے پہلے ہی اسکول سے چلی جاتی ہے، جس پر انہوں نے متعدد مرتبہ اس کو سمجھایا مگر وہ اپنی اس عادت سے باز نہیں آئی ہے، جس کے بعد انہوں نے پوجا تومر کی غیر حاضری لگانا شروع کردی۔
پوجا تومر نے ہیڈ ماسٹر پر دباؤ بنانے کے لیے اے بی ایس اے پربھات کمار سے شکایت کی، جس کے بعد اے بی ایس اے پربھات کمار مذکورہ اسکول پہنچے اور رجسٹر لیکر ہیڈ ماسٹر کے سامنے ہی ٹیچر پوجا تومر کی سبھی غیر حاضریوں کو حاضری میں تبدیل کردیا۔ جس کے بعد ہیڈ ماسٹر نے اس کی شکایت اور اے بی ایس اے پر نازیبا سلوک کرنے کا الزام عائد کیا۔
سریندر کمار کا کہنا ہے کہ اعلیٰ افسران سے اس نے اس کی شکایت بھی کی، جس کے بعد ایک تحقیقاتی کمیٹی بنائی گئی اور تحقیق میں ٹیچر پوجا تومر قصوروار بھی پائی گئی، مگر اس کے باوجود بھی ان کے اوپر کوئی کارروائی نہیں کی گئی، بعد میں رامپور تھانے میں دونوں کے خلاف مقدمہ درج کیا گیا ہے۔
