مرکز کے زیر انتظام جموں و کشمیر کے ضلع رامبن کے ٹراما سینٹر کی خستہ حال سڑک اور ڈرین کی 'ناقص' تعمیر کے سبب مقامی باشندوں خاص کر مریضوں کو کافی پریشانیوں کا سامنا کرنا پڑ رہا ہے۔
کورٹ روڈ سے ٹراما سینٹر (کووڈ ہسپتال) کو جوڑنے والے سڑک پر جگہ جگہ بلڈنگ میٹریل اور گندگی کی وجہ سے لوگوں نے انتظامیہ اور متعلقہ محکمہ کے تئیں ناراضگی کا اظہار کیا ہے۔
وہیں اس معاملے پر بار صدر (رامبن) ایڈوکیٹ آصف رونیال نے ای ٹی وی بھارت کے ساتھ بات کرتے ہوئے کہا کہ سڑک اور ڈرین کی ’ناقص‘ حالت سے لوگوں کو خاص کر مریضوں کی مشکلات میں مزید اضافہ ہوا ہے۔
انہوں نے بتایا کہ ٹراما سینٹر میں ضلع کووڈ اسپتال قائم گیا گیا ہے۔ جس میں ضلع بھر کے مریضوں کو رکھا گیا ہے۔ یہاں تک پہنچنے میں ایمبولنس کو بھی کافی دقتوں کا سامنا کرنا پڑتا ہے۔
انہوں نے ضلع انتظامیہ و محکمہ تعمیرات کے افسران سے فوری مرمت کرنے کا مطالبہ کیا۔
یہ بھی پڑھیں: Jammu Drone Attack وزیر اعظم کی صدارت میں اعلی سطحی اجلاس
اس سلسلے میں ای ٹی وی بھارت نے میونسپل کمیٹی کی چیئرپرسن سنیتا کماری سے روڈ کی خستہ حالی کی وجوہات جاننے کی کوشش کی۔ انہوں نے تصدیق کرتے ہوئے بتایا کہ 'انہوں نے دو ماہ قبل ہی چارج سنبھالا ہے تاہم وہ سڑک کی مرمت کا کام جلد از جلد شروع کروائیں گی۔'
انہوں نے کہا کہ وہ ضلع کے تمام وارڈوں میں سڑک رابطہ بہتر بنانے کے علاوہ گلیوں، نالیوں اور لائٹس کا معقول بندوبست کرنے کی بھر پور کوشیش کریں گی۔
