ایڈوائزری میں کہا گیا کہ گذشتہ کئی دنوں سے ایسی رپورٹز مل رہی ہیں جن کے مطابق بعض پولیس وسِول افسروں اور عام لوگوں کو مشتبہ نامعلوم فون نمبرات سے فون کالز آرہی ہیں جن میں فون کرنے والے اپنے آپ کو سینیئر فوجی، پولیس اور سِول آفیسرز بن کر اُن سے سکیورٹی معاملات کے بارے میں معلومات طلب کرنے کی کوشش کرتے ہیں۔
ایڈوائزری کے مطابق ماہرین کی جانب سے باریکی سے کی گئی تحقیقات کے بعد معلوم ہوا کہ ان کالز کی جڑیں اسپیشل سافٹ ویئر سسٹم کے ذریعے بیرون ملک سے جڑتی ہیں جس کے باعث موبائیل اسکرین پر +91 کوڈ آتا ہے۔
اس میں کہا گیا کہ 'اب تک کی تحقیق کے مطابق یہ کالز بیرون ملک سےکی جاتی ہیں جن کی وساطت سے کچھ شرپسند عناصر، ملک دشمن وسماج دشمن عناصر بھیس بدل کر لوگوں کو بے وقوف بنانے کی کوششیں کرتے ہیں تاکہ وہ اہم معلومات حاصل کرسکیں'۔
ایڈوائزری میں کہا گیا کہ 'ایسی صورتحال میں لوگوں سے تاکید کی جاتی ہےکہ وہ مشکوک کالرز کی فون کالز کو نہ اٹھائیں اور اس سلسلے میں فوراً متعلقہ پولیس اسٹیشن میں رپورٹ درج کریں یا ایس ایس پی کے دفتر کے ساتھ براہ راست رابطہ کریں۔
اس میں کہا گیا کہ یہ بات واضح کی جاتی ہے کہ کوئی بھی فوجی، پولیس یا سیول آفیسر لوگوں کے ساتھ براہ راست رابطہ کرکے سیکورٹی معاملات کے بارے میں معلومات طلب نہیں کرتا ہے۔
