ریاست چھتیس گڑھ کے یوم تشکیل کے موقع پرکانگریس کی عبوری صدر سونیا گاندھی نے وزیراعلیٰ بھوپیش بھگیل اور عوام کو بھی مبارکباد پیش کی۔
اپنے ایک پیغام میں سونیا گاندھی نے لکھا کہ 'مجھے خوشی ہے کہ چھتیس گڑھ کی عوام نے ایک مرتبہ پھر جمہوریت اور بھائی چارے کا راستہ چن لیا ہے'۔
انہوں نے مزید کہا کہ نئی حکومت کے قیام کے بعد ریاست ترقی کی راہ کی طرف گامزن ہے۔
انہوں نے لکھا کہ ایسے وقت میں جب بیشتر ریاستیں معاشی سست روی اور بے روزگاری سے دوچار ہیں کانگریس کے زیرقیادت حکومت کی کوششوں کی وجہ سے چھتیس گڑھ میں صورتحال ایک حد تک قابو میں ہے۔
انہوں نے سابق وزیر ودیا چرن شکلا، کانگریس قائدین نند کمار پٹیل، مہیندر کرما اور دیگر کو بھی خراج عقیدت پیش کیا جو سنہ 2013 میں نکسلی حملے میں ہلاک ہوئے تھے۔
ریاست کے یوم تشکیل کے پروگرام میں وزیر اعلیٰ بھوپیش بگھیل نے کہا کہ ریاستی حکومت کا ہدف ایک جامع ترقی ہے جس میں غریب ، کسان ، شیڈول ذات ، شیڈول قبائل اور پسماندہ طبقات کو ترقی کا فائدہ ملتا ہے۔ ریاستی حکومت تمام لوگوں کو نوکری دینا چاہتی ہے۔
