اس سلسلے میں آل بہار اردو جرنلسٹ فورم کے صدر اشرف استھانوی نے بہار کے وزیر اقلیتی فلاح و بہبود زماں خان سے ان کے دفتر میں ملاقات کر ایک عرضداشت پیش کر بہار کے اردو صحافیوں و ادیبوں کی سخت مالی دشواریوں کے سبب فی الفور ان سے ان قلم کاروں کی مالی اعانت کی اپیل کی ہے۔
فورم کے صدر اشرف استھانوی نے وزیر اقلیتی سے کہا کہ اس سلسلے میں کئی خطوط وزیر اعلیٰ کے میل پر ارسال کئے گئے ہیں لیکن وزیر اعلیٰ کی سطح سے اب تک کوئی کارروائی نہیں ہوئی ہے۔
عرضداشت میں کہا گیا ہے کہ تقریباً ڈیڑھ سال سے لاک ڈاؤن کے نتیجہ میں جہاں سماج کا دوسرا طبقہ متاثر ہوا ہے وہیں قلم کار طبقہ یعنی صحافی، ادیب اور شعراء بھی متاثر ہوا ہے۔ سبھی سیاسی، صحافتی و ادبی سرگرمیاں ٹھپ رہنے کے سبب ان کی آمدنی کے ذرائع بند ہو گئے ہیں اور انہیں سخت مالی دشواریوں کا سامنا ہے۔
مزید پڑھیں:
بھاگلپور: ارحم ٹرسٹ کی جانب سے آن لاین اردو سکھائی جا رہی ہے
اشرف استھانوی نے مزید کہا کہ کئی گھروں میں فاقہ کشی تک کی نوبت ہے، لیکن یہ طبقہ چونکہ سفید پوش ہے اس لئے سوالی بن کر سامنے نہیں آ سکتا ہے اور نہ بھیک مانگ سکتا ہے۔ اگر اس مشکل گھڑی میں ان کی سرکاری سرپرستی نہیں ہوئی تو سماج ان کی خدمت سے ہمیشہ کے لئے محروم ہو جائے گا۔ اقلیتی وزیر نے معاملے کی سنجیدگی کو دیکھتے ہوئے اسے مسئلہ کو جلد سے جلد حل کرانے کی یقین دہانی کرائی۔
