ریاست بہار کے گیا میں واقع بین الاقوامی ہوائی اڈے پر وندے بھارت مشن کے تحت بیرون ملک میں پھنسے بہار و جھارکھنڈ کے طلباء کی واپسی کاسلسلہ جاری ہے، بدھ کو ایئرانڈیا کے ذریعے روس کے ماسکو میں تعلیم حاصل کرنے والے 141 طلباء وطالبات کی واپسی ہوئی ہے۔
گیا ہوائی اڈے پر اسکریننگ وطبی جانچ کے بعد سبھی طلباء کو بودھ گیا میں قائم کردہ قرنطین مرکز میں رکھا گیا ہے، یہاں قرنطین کی مدت مکمل کرنے کے بعد انہیں ان کے گھر روانہ کیا جائے گا،۔
ماسکو سے واپس آنے والی ایک طالبہ نیپو شرما نے بتایا کہ ماسکو میں کورونا کے کیسز میں تیزی سے اضافہ ہو رہا ہے، انہوں نے بتایا کہ کہ انہیں وہاں متعدد مسائل کاسامنا تھا، والدین بھی یہاں پریشان تھے جسکی وجہ سے واپس آنے کا فیصلہ کیا۔
انہوں نے کہا کہ ماسکو میں بھی بچاو کے انتظامات تھے تاہم جو یہاں ہوائی اڈے پر دیکھنے کو ملا ہے وہ قابل تعریف ہے، معاشرتی فاصلے کے لیے جو یہاں سرکل بنایاگیا ہے اس طرح کے انتظامات ماسکو میں بھی نہیں تھے، ماسکو سے یہاں ہوائی اڈے تک بہتر انتظامات دیکھنے کو ملے ہیں۔
چمپارن بہار کے رہنے والے ایک اور طالب علم نے بتایا کہ امید سے زیادہ گیا ہوائی اڈے پر انتظامات ہیں، وندے بھارت مشن کے تحت ماسکو میں بھی بھارتی حکومت بہتر خدمات انجام دی جارہی ہے۔
