بہار میں کورونا کا قہر مسلسل جاری ہے۔ نالندہ ضلع میں ایک ساتھ 17 لوگوں کی رپورٹ پوزیٹیو آنے سے پورے صوبے میں خوف کا ماحول ہے۔
بہار میں اب تک دو کروڑ لوگوں کی اسکریننگ ہو چکی ہے۔ حکومت کی جانب سے مختلف اضلاع میں ڈور ٹو ڈور اسکریننگ کرائی جا رہی ہے۔ اسی سلسلے میں ایک ٹیم کوچادھامن حلقہ کے مودھو پنچایت میں واقع گمہریا گاوں پہنچی جہاں این پی آر کی غلط فہمی کی وجہ سے لوگ گھروں سے باہر نہیں نکلے اور مجبوراً ٹیم واپس لوٹ آئی۔
دراصل ہوا یوں کہ گمہریا گاؤں سے کچھ لوگوں نے نمائندہ ای ٹی وی بھارت کو فون کرکے بتایا کہ ایک ٹیم سروے کے لئے آئی ہے۔ لوگوں کو اندیشہ ہے کہ کہیں یہ این پی آر تو نہیں کر رہی ہے۔
کشن گنج ضلع سے تقریباً 24 کیلو میٹر دور گمہریا گاؤں جب ای ٹی وی نمائندہ پہونچا تو پتہ چلا کہ دراصل سیویکا کی ٹیم آئی تھی جو یہ معلوم کر رہی تھی کہ حال کے دنوں میں کوئی باہر سے تو نہیں لوٹا ہے یا کسی کو کھانسی سردی تو نہیں ہے۔
اس موقع پر نمائندہ نے گاؤں کے ذمہ داران سے بات کر انہیں اس جانچ کے فائدے سمجھائے اور ایسی ٹیم کو ہر طرح سے تعاون کی اپیل کی۔
خیال رہے کہ غلط فہمی ہی کی وجہ سے گزشتہ دنوں مراد آدا اور بہار کے اورنگاباد اور چمپارن میں ڈاکٹر اور پولس کی ٹیم پر حملہ ہو چکا ہے۔
