بہار ریاستی حج کمیٹی کے شعبہ کوچنگ اینڈ گائیڈنس سیل کے ذریعہ اقلیتی طلباء وطالبات کے لیے مفت میں آن لائن کوچنگ کا آغاز کیا گیا ہے۔
بہار سول سروسز 65 ویں مینس امتحان کی تیاری کے لیے مفت آن لائن کوچنگ کا آغاز کیا گیا ہے۔ اس سے حج کمیٹی کے شعبہ کوچنگ اینڈ گائیڈنس کے ذریعہ تربیت یافتہ بی پی ایس سی 65 پی ٹی میں کامیاب ہوئے تقریباً 70 طلباء و طالبات مستفید ہوں گے۔
ریاستی حج کمیٹی کے چیف ایکزکیوٹیو آفیسر محمد راشد حسین نے ای ٹی وی بھارت سے خصوصی بات چیت میں کہا کہ' لاک ڈاون کی وجہ سے حج ہاوس کے شعبہ کوچنگ اینڈ گائیڈنس سیل نے بہار سول سروسز 65 ویں مینس امتحان کی تیاری کے لیے مفت آن لائن کوچنگ کا آغاز کیا ہے۔
انہوں نے ریاستی حکومت، محکمہ اقلیتی فلاح کے وزیر خورشید عرف فیروز احمد اور پرنسپل سیکرٹری عامر سبحانی کا شکریہ ادا کرتے ہوئے کہا کہ 65 ویں بی پی ایس سی مینس امتحان کی تیاری کے لیے آن لائن کوچنگ کا آغاز ہو گیا ہے یہ اپنے اختتام تک بخیر و خوبی جاری رہے گا۔ انہوں نے کہاکہ' آئندہ کچھ دنوں میں سب انسپکٹر کی مقابلہ جاتی امتحان کی تیاری کے لیے بھی آن لائن کوچنگ کا آغاز کیا جائے گا'۔
