پٹنہ: کلیم امام قریشی اتفاق رائے آل انڈیا جمعیت القریش کے ریاستی صدر منتخب

قریش برادری کی کل ہند نمائندہ سماجی تنظیم " آل انڈیا جمعیت القریش" کے ریاستی صدر کا انتخاب پٹنہ شہر کے درگاہ روڈ واقع منگلم ہوٹل کے کانفرنس ہال میں عمل میں آیا۔ اس میں جمعیت القریش کے صدر کلیم امام قریشی کو دوبارہ اتفاق رائے سے صدر منتخب کر لیا گیا۔

انتخاب کے آبزرور ممتاز عالم قریشی نے دوسرے نام پیش کئے جانے کا وقت دیا مگر کسی کی جانب سے کوئی نام پیش نہیں ہونے سے ممتاز عالم قریشی نے کلیم امام قریشی کے صدر کے نام کا اعلان کیا اور سرٹیفیکیٹ پیش کیا۔

اس انتخاب میں بہار کے تمام اضلاع سے قریشی برادران شریک ہوئے اور انتخاب میں حصہ لیا۔ صدر منتخب ہونے کے بعد کلیم امام قریشی نے تمام لوگوں کا شکریہ ادا کرتے ہوئے کہا کہ آپ لوگوں نے ایک بار پھر سے مجھ پر جو بھروسہ کیا ہے اسے میں قائم رکھوں گا۔ کلیم امام نے کہا کہ یہ تنظیم آزادی سے قبل 1924 میں بنی تھی جس کا مقصد اس برادری کو تعلیم اور بہتر روزگار کے لئے جوڑنا تھا مگر ہماری بد قسمتی ہے کہ آج تک کسی بھی حکومت نے اس برادری کے مفلوک الحال پر توجہ نہیں دی، یہی وجہ ہے کہ اس برادری کے پانچ سے دس فیصد ہی لوگ تعلیم یافتہ ہیں، مگر ہماری کوشش ہوگی کہ جو بھی ہمارے حقوق ہیں اس کو لیکر ہم جدوجہد کریں گے۔

مہمان خصوصی کی حیثیت سے شریک ہوئے نتیش حکومت کے ایم ایل سی مولانا غلام رسول بلیاوی نے کہا کہ اس انتخاب میں جو گیارہ نکاتی تجاویز سامنے آئی ہیں ہماری پوری کوشش ہوگی کہ اسے حکومت تک پہنچائے، ان کے جو بھی مطالبے ہیں وہ یقیناً سنجیدہ ہے جس پر توجہ دینے کی ضرورت ہے۔ اس موقع پر جمعیت کے نائب صدر اخلاق احمد قریشی، یوتھ قریشی کے ریاستی صدر عبد العزیز قریشی، دولت امام قریشی، سابق رکن کونسل آزاد گاندھی وغیرہ نے بھی اظہار خیال کیا۔