بہار قانون ساز کاؤنسل کی نو سیٹوں کے لئے 25 جون کو انتخاب ہونا ہے۔ اس بار تین سیٹ جے ڈی یو، تین سیٹ آر جے ڈی، دو سیٹ بی جے پی اور ایک سیٹ کانگریس کے حصے میں آئی ہے۔
آئندہ اسمبلی انتخاب کو دیکھتے ہوئے ریاست کی تمام بڑی سیاسی جماعتوں نے قانون ساز کاؤنسل کے لئے ہونے والے انتخابات میں تمام طبقات کو خوش کرنے کی کوشش شروع کر دی ہے۔ برسرِ اقتدار جماعت جے ڈی یو اور بی جے پی کے حصے میں 5 سیٹ آئی ہے۔ جے ڈی یو کی 3 سیٹوں میں ایک مسلمان کو ملنے کی امید ہے۔ جے ڈی یو انصاری برادری سے کسی کو قانون ساز کاؤنسل کا رکن بنا سکتی ہے۔ ابھی جے ڈی یو کے پاس کوئی بڑا انصاری چہرہ نہیں ہے۔ ایک کے بعد ایک انصاری لیڈران نے جے ڈی یو چھوڑ دیا۔ پارٹی امتیاز احمد انصاری کو امیدوار بنا سکتی ہے۔
آر جے ڈی نے بھی ایک مسلمان کو قانون ساز کاؤنسل بھیجنے کا فیصلہ کیا ہے۔ دوسری سیٹ پر پسماندہ طبقہ سے ایک امیدوار اور اعلیٰ برادری سے ایک امیدوار لالو یادو کے بڑے بیٹے تیج پرتاپ یادو اور آر جے ڈی کے ریاستی صدر جگدا نند سنگھ کا نام بھی سامنے آ رہا ہے۔ جے ڈی یو نے دلت لیڈر اور محکمہ تعمیرات عمارت کے وزیر اشوک چوہدری کو بھیجنے کا فیصلہ کیا ہے۔ تیسری سیٹ پر کسی پسماندہ کو بھیجا جائے گا۔ بی جے پی نے امت شاہ کے قریبی کہے جانے والے سنجئے میوکھ کو بھیجنے کا فیصلہ کیا ہے۔ جبکہ کانگریس کی ایک سیٹ کے لئے فیصلہ اعلی کمان کو کرنا ہے۔
