کشن گنج: مرکزی حکومت کی جانب سے نافذ کردہ زرعی قوانین کے خلاف آج کانگریس نے ستیہ گرہ پیدل مارچ نکالا۔ یہ مارچ کشن گنج شہر کے لہرا چوک سے شروع ہو کر بہار بس اسٹینڈ و کلکٹریٹ ہوتے ہوئے کانگریس ضلع دفتر پہنچا، جہاں یہ پیدل مارچ اختتام ہوا۔ جس کے بعد ضلع پارٹی دفتر میں ایک پروگرام منعقد کیا گیا۔
اس موقع پر کانگریس بہار انچارج بھگت چرن داس، کانگریس ریاستی صدر مدن موہن جھا، کانگریس کارگزار ریاستی صدر کوکب قادری، کشن گنج رکن پارلیمنٹ ڈاکٹر جاوید، رکن اسمبلی اظہار الحسن، انل شرما، یوتھ کانگریس ریاستی صدر گنجن پٹیل، دولت امام انتخاب عالم وغیرہ موجود رہے۔
کانگریس کے ریاستی انچارج بھگت چرن داس نے عوام سے خطاب کرتے ہوئے کہا کہ ہمارے رہنما راہل گاندھی کی ایک آواز پر ملک کے گوشہ گوشہ سے کانگریس کارکنان و لیڈران اپنے اپنے گھروں سے باہر نکل کر اناج پیدا کرنے والے کسان بھائیوں کے ساتھ کھڑے ہیں۔ انہوں نے کہا کہ مرکزی حکومت کو کسان بھائیوں کی کوئی فکر نہیں ہے۔ بی جے پی سرکار کو ہر حال میں یہ سیاہ قوانین واپس لینا ہوگا، جب تک یہ قوانین واپس نہیں ہو جاتے تب تک ہم کانگریس کے سبھی لیڈران و کارکنان کسان بھائیوں کے ساتھ سڑکوں پر رہیں گے۔
اس دوران پروگرام کو خطاب کرتے ہوئے کانگریس کے کشن گنج رکن پارلیمنٹ ڈاکٹر جاوید نے بھی زرعی قوانین کی پر زور مخالفت کی۔ ساتھ ہی کارکنان کو پارٹی کے تیئں مزید محنت کرنے کی بات کہی۔ انہوں نے مزید کہا کہ پارٹی کو ریاست بھر میں مزید مضبوط کرنے کی ضرورت ہے تاکہ حق کی آواز بلند کرنے میں مزید قوت مل سکے۔ اس موقع پر مدن موہن جھا، کوکب قادری، انل شرما کے علاوہ دیگر رہنماؤں نے بھی زرعی قوانین کو لیکر اظہار خیال کیا۔
