بہار اسمبلی انتخابات کے تعلق سے انتظامیہ پوری طرح سے مستعد ہے اور مختلف شعبوں کے اعلیٰ افسران کے ساتھ میٹنگ کر ان کے ذمہ کام سونپا جا رہا ہے تاکہ انتخابات کو صاف و شفاف اور بدعنوانی سے پاک رکھا جاسکے۔
ضلع ارریہ میں بھی گرام رکشا دل نے بہار اسمبلی انتخاب میں اپنی شراکت پیش کرتے ہوئے ضلع کلکٹر کو ایک میمورنڈم حوالے کیا ہے، جس میں مطالبہ کیا گیا ہے کہ گرام رکشا دل بھی ریاستی حکومت کا ایک جزء ہے اور اس سے قبل بھی انتخابات میں الیکشن کمیشن ہم لوگوں کی خدمات حاصل کرتی رہی ہے لہذا اس انتخابات میں بھی ہم لوگوں سے کام لیا جائے۔
گرام رکشا دل کے ترجمان شاہ جہاں نے کہا کہ ہم لوگوں کا مطالبہ شروع سے رہا ہے کہ دیگر لوگوں کی طرح ہم لوگوں کو بھی وردی، جوتا، بیچ، لاٹھی اور جوائنگ لیٹر دیا جائے تاکہ ہم لوگ پوری طرح سے اپنے کام کو انجام دے سکیں۔
گرام رکشا دل کے ضلع صدر آشیش تیواری نے کہا کہ ہم لوگوں سے کہا جاتا ہے کہ آج نہیں تو کل لیٹر دیا جائے گا، لیکن صرف تاریخ پر تاریخ دی جا رہی مگر لیٹر نہیں، سینکڑوں لوگ گرام رکشا دل کے اسی انتظار میں ہیں، اس لیے ضلع کلکٹر پرشانت کمار اس معاملے کو اپنے علم میں لاتے ہوئے اسے حل کرنے کی کوشش کریں۔
