سابق وزیر شیام رجک نے آر جے ڈی قانون ساز اسمبلی کی لیڈر اور سابق وزیراعلیٰ رابڑی دیوی کے دس سرکلر روڈ واقع سرکاری رہائش پر اسمبلی میں اپوزیشن لیڈر تیجسوی پرساد یادو کی موجودگی میں منعقدہ ملن تقریب میں جے ڈی یو سے ناراضگی پر پہلی بار اپنی خاموشی توڑتے ہوئے کہا کہ ملک میں دبے، کچلے لوگوں کے لیے حکومت کچھ نہیں کر رہی ہے۔
انھوں نے کہا کہا کہ بہار کی نتیش حکومت ترقی کے نام پر صرف دکھاوا کر رہی ہے، انہوں نے کہا کہ جہاں سماجی انصاف کا قتل ہورہا ہے وہاں وہ کسی حالت میں نہیں رہ سکتے تھے۔
آرجے ڈی لیڈر نے کہا کہ انہیں وزارت کے عہدے کی کبھی لالچ نہیں رہی، وہ جے ڈی یو میں رہتے ہوئے کئی بار تنظیم اور حکومت کے طریقہ کار پر وزیراعلیٰ نتیش کمار سے ملنے کے لیے وقت مانگتے رہے لیکن انہیں وقت نہیں دیا گیا۔
رجک نے مزید کہا کہ جے ڈی یو پارٹی کے آئین کو بھی نہیں مان رہا ہے، پارٹی آئین کی دفعہ 19 میں واضح طور پر لکھا گیا ہے کہ کسی بھی لیڈر کو بغیر وجہ بتاﺅ نوٹس جاری کئے خارج نہیں کیاجاسکتا۔ ان کے معاملے میں جے ڈی یو نے اپنے آئین کے ضابطوں کی خلاف ورزی کی ہے اور بغیر وجہ بتاﺅ نوٹس کے ہی ان کے خلاف کاروائی کر دی۔
