ارریہ: سنت روی داس اور چندر شیکھر آزاد کو خراج عقیدت

ریاست بہار کے ضلع ارریہ میں کانگریس کے ضلع دفتر پر صوفی سنت روی داس اور مجاہد آزادی چندر شیکھر آزاد کو خراج عقیدت پیش کیا گیا۔

ضلع ارریہ کے گاندھی آشرم میں واقع کانگریس کے ضلع دفتر پر ہفتہ کو پارٹی کارکنان و لیڈران نے صوفی سنت روی داس کے 644 ویں یوم پیدائش اور مجاہد آزادی چندر شیکھر آزاد کے یوم وفات پر انہیں خراج عقیدت پیش کیا۔

پارٹی دفتر پر منعقد تقریب کے دوران کانگریس لیڈران و کارکنان نے دونوں کی تصاویر پر گلباری کر انہیں نم آنکھوں سے یاد کیا۔ اس موقع پر ارریہ شہر کے رکن اسمبلی عابدالرحمن، کانگریس کے ضلع صدر انل کمار سنہا، نائب صدر ڈاکٹر صدر عالم، ضلع ترجمان سبطین سمیت دیگر کارکنان نے اس تقریب میں شرکت کی۔

میڈیا سے بات کرتے ہوئے کانگریس کے ضلع صدر نے کہا کہ 'سنت روی داس ملکی نہیں بلکہ عالمی سطح کی شخصیت تھی، ان کے ماننے والے دنیا کے کونے کونے میں موجود ہیں۔ انہوں نے پوری زندگی امن، شانتی اور آپسی بھائی چارہ اور اخوت و محبت کا پیغام دیا۔'

انہوں نے مزید کہا کہ 'آج ہم عہد لیتے ہیں کہ سنت روی داس جی کے بتائے ہوئے راستے پر چل کر انہیں سچا خراج عقیدت پیش کریں گے۔'

وہیں رکن اسمبلی عابدالرحمن نے مجاہد آزادی چندر شیکھر سنگھ آزاد کو ہندوستان کی آزادی کا سب سے نمایاں ہیرو قرار دیتے ہوئے کہا کہ 'ملک کو انگریزوں سے آزاد کرانے کے لئے انہوں نے جان کی قربانی پیش کر دی، ایسے سپوتوں کی وجہ سے ہی آج ہم ہندوستان میں کھلی فضا میں سانس لے رہے ہیں۔'

کانگریس کے ضلع نائب صدر نے کہا کہ سنت روی داس کے کئی دوہے کافی مشہور اور زبان زد عام ہیں جسے پڑھنے کے بعد ہمیں اچھا درس حاصل ہوتا ہے۔ ہر قوم اور ہر مذہب میں ان کے ماننے اور چاہنے والے افراد موجود ہیں۔

کانگریس کے ضلع ترجمان نے سنت روی داس کو خراج عقیدت پیش کرتے ہوئے کہا کہ ’’سنت روی داس جیسے لوگ کبھی نہیں مرتے بلکہ وہ اپنی فکر کی وجہ سے ہر ایک کے دلوں میں زندہ ہیں، انہوں نے انسانیت کا جو سبق دیا ہے اسے آج دہرانے کی ضرورت ہے۔

اس موقع پر پارٹی کے دیگر کارکنان نے بھی سنت روی داس اور چندر شیکھر آزاد کی سوانح حیات پر اپنے خیالات کا اظہار کیا۔