کورونا انفیکشن کی دوسری لہر میں نوئیڈا کے دو طلبا نے نہ صرف نوئیڈا کے عوام کی مدد کرنے کا فیصلہ کیا بلکہ ملک بھر کے شہروں میں کورونا متاثرین اور ان کے اہل خانہ کی مدد کرنے کے لیے ایک ویب سائٹ (Https://www.Aapkiumeed.In) کے نام سے شروع کی ہے۔
اس ویب سائٹ پر کورونا کے روزانہ کے کیسز کی تازہ معلومات کے ساتھ ساتھ ریاستوں اور شہروں میں کووڈ ہسپتالوں کی فہرست، آکسیجن والے بستروں کی دستیابی، وینٹی لیٹر اور پلازمہ کی معلومات بھی فراہم کی جاتی ہے۔ جس سے اب تک سیکڑوں متاثرین اس سائٹ سے فیض حاصل کر چکے ہیں۔
طلبا کا کہنا ہے کہ اس سائٹ میں بہت جلد فنگس کے متعلق معلومات بھی ایڈ کریں گے تاکہ لوگوں کو در در بھٹکنا نہ پڑے۔
کورونا کی دوسری لہر میں متعدد ریاستوں اور شہروں میں کورونا میں مبتلا لوگوں نے اس ویب سائٹ کے ذریعہ فائدہ بھی حاصل کیا ہے، ایک بڑی غیر سرکاری تنظیم (ہیا) نے بھی اس ویب سائٹ کو اپنی فہرست میں درج کیا ہے۔
11ویں جماعت کے طالب علم راگھو سنگھ بھدوریہ نے مادھو کرن کے تعاون سے اس کام کو انجام دیا۔ راگھو اس سے قبل ڈرون منصوبے پر بھی کام کرچکا ہے، جس میں ماسک کے بغیر شہر میں گھومنے والوں کی تصویر قید کی جاسکتی تھی۔
محکمہ انکم ٹیکس میں تعینات افسر شیودن سنگھ کے بیٹے راگھو سنگھ بھدوریہ سیکٹر 47 میں رہتے ہیں جبکہ مادھو کرن اگروال سیکٹر 41 میں رہائش پذیر ہے۔
