کورونا وائرس سے تحفظ کے لئے سب سے اہم احتیاطی تدابیر اور اقدامات میں سماجی فاصلہ ایک موثر حکمت عملی ہے لیکن نوئیڈا میں اس کی دھجیاں اڑائی جا رہی ہیں اور اس کا مذاق بنا کر رکھ دیا گیا ہے۔
سیکٹر 9 میں راشن لینے کے لئے سماجی فاصلہ کا خیال کئے بغیر لمبی قطار لگ گئی۔ اس دوران ضلع انتظامیہ یا نوئیڈا پولیس کے اہلکار بھی دکھائی نہیں دئے، جو سماجی فاصلہ کے عمل کو یہاں پر قائم کرنے میں لوگوں کا تعاون کرتے۔
سماجی فاصلہ قائم کرنے کے لئے پولیس اہلکار کی تعیناتی ہر بڑے شہر میں ہوتی ہے اور گزشتہ دنوں اسی لاپروائی کے باعث نوئیڈا کے ڈی ایم کا ٹرانسفر اترپریدش حکومت نے کر دیا تھا اور اس کے متعلق ریاست کے ویزر اعلیٰ یوگی آدتیہ ناتھ نے ڈی ایم کو پھٹکار بھی لگائی تھی۔
جس جگہ پر یہ قطار لگائی گئی تھی وہاں سے چند قدم کے فاصلے پر سیکٹر 20 تھانہ واقع ہے جب کہ اترپردیس میں سب سے زیادہ کورونا وائرس متاثرہ مریض نوئیڈا میں ہیں۔
یہ تصویر یہ ظاہر کرتی ہے کہ کس طرح ضلع انتظامیہ اس وبا کو نظر انداز کر رہا ہے کیونکہ یہ تصویر کسی گلی کی نہیں بلکہ نوئیڈا کی ایک اہم شاہراہ کی ہے جہاں حکومت کے ذریعہ غریبوں کے درمیان راشن تقسیم کیا جا رہا ہے، جس کی جانکاری مقامی پولیس کو بھی ہے لیکن اس کے باوجود ایسے مقامات پر پولیس کا نہ ہونا اور سماجی فاصلے کا خیال کئے بغیر قطار میں کھڑے ہونا ایک بڑے مسئلے کو دعوت دینے جیسا ہو سکتا ہے۔
