اترپردیش کے شہر نوئیڈا کے سیکٹر-58 میں کوتوالی پولس نے 25 ہزار کا انعامی گائے اسمگلر کو گولی ماردی ہے۔ جس کے بعد پولیس نے اسے گرفتار کر کے ضلع اسپتال میں داخل کرایا۔
سیکٹر-62 میں جے پوریہ کٹ کے قریب انکاؤنٹر میں زخمی ہونے والے بدمعاش کی شناخت غازی پور دہلی کے رہنے والے سونو قصائی کے طور پر کی گئی ہے۔ ملزم گذشتہ کئی سالوں سے گائے کا گوشت اسمگل کر رہا تھا ۔ نوئیڈا زون کے اے ڈی سی پی رنوجے سنگھ نے بتایا کہ کوتوالی سیکٹر-58 کے انچارج انسپکٹر ونود کمار اپنی ٹیم کے ساتھ سیکٹر-62 کے جے پوریہ کٹ کے قریب گاڑیوں کی جانچ کر رہے تھے۔تبھی موٹر سائیکل پر سوار مشتبہ شخص کو پولیس نے رکنے کا اشارہ کیا۔
پولیس کو دیکھتے ہی موٹر سائیکل سوار بھاگنے لگا۔ پولیس نے بھی اس کا تعاقب کیا،جس کےبعد اس نے پولیس پر فائرنگ کر دی۔ پولیس کی جوابی کارروائی میں موٹر سائیکل سوار سونو قصائی کے پیر میں گولی لگ گئی۔ پولیس نے بتایا کہ سونو کے ساتھی شیکھر کو تین دن قبل پولیس نے گرفتار کیا تھا۔ سونو قصائی کے خلاف 6 سے زائد مقدمات درج ہیں۔ اس پر 25 ہزار انعام کا اعلان تھا۔ ملزم کے قبضہ سے موٹر سائیکل، پستول اور زندہ کارتوس برآمد کر لیے گئے ہیں۔
پولیس کے مطابق گروہ کا ایک اور اسمگلر ساجد تاحال فرار ہے۔ وہ تین روز قبل سیکٹر 62 میں ہونے والے پولیس مقابلے میں فرار ہو گیا تھا۔ پولیس اسے تلاش کر رہی ہے۔
