ضلع نوئیڈا میں ہول سیل مارکیٹ کے مطالبے کے حوالے سے اتر پردیش صنعتی وفد کے نمائندوں نے راجیہ سبھا کے رکن پارلیمنٹ ڈاکٹر اشوک واجپئی سے ملاقات کی اور خط کے ذریعہ پریشانیوں اور مسائل سے آگاہی کراتے ہوئے دیوالی کی پیشگی مبارکباد بھی دی۔
ضلعی صدر نریش کچل نے بتایا کہ 43 سال سے زیادہ کا عرصہ گزر جانے کے باوجود بھی یہ شہر ہول سیل مارکیٹ کا منتظر ہے، حکومتیں آئیں اور چلی گئیں، ہول سیل مارکیٹ کے نام پر بس وعدے ملے، پتہ نہیں کتنی مرتبہ اس سلسلے میں خط لکھ کر نوئیڈا اتھارٹی کو آگاہ کیا گیا لیکن فائدہ کچھ نہیں ہوا۔
ترجمان چندر پرکاش گور نے بتایا کہ مذکورہ تناظر میں نوئیڈا اتھارٹی اور کمرشل ٹیکس ڈیپارٹمنٹ کو اس معاملے پر متعدد بار آگاہ کیا گیا ہے کہ ہول سیل مارکیٹ کی کمی کی وجہ سے تاجروں کو قریبی ریاستوں سے سامان لانے پر مجبور ہیں لہذا یہاں ایک ہول سیل مارکیٹ ضرور تعمیر کی جائے۔
وائس چیئرمین سی پی شرما نے کہا کہ صنعتی شہر کے نام سے وجود میں آئے شہر میں تمام بلڈروں، تعلیمی اداروں، اسپتالوں، ہوٹلوں اور سماجی تنظیموں کو جگہ دی گئی تھی لیکن ٹیکس ادا کرنے والے تاجروں کے لیے ہول سیل مارکیٹ آج تک تعمیر نہیں کی گئی۔
مسائل سننے کے بعد ڈاکٹر اشوک واجپائی نے تاجروں کو یقین دلایا کہ وہ اس مسئلے کے حل کے لیے ایوان کی کارروائی میں یقینی طور پر ایک قرار داد پیش کریں گے اور ہر ممکن مدد کریں گے۔
