قومی راجدھانی دہلی سے متصل ضلع گوتم بدھ نگر کے ڈی ایم نے ضلع میں دکانداروں اور ضروری اشیاء کی فروخت کرنے والے ہاکروں کے لئے آج ایک نئی ایڈوائزری جاری کی ہے تاکہ لوگوں سے ضروری اشیاءکے لئے زیادہ رقم کی وصولی نہ کی جا سکے۔
ملک میں لاک ڈائون کے بعد ضروری اشیاء کی قیمتوں میں اچانک اضافے کئے جانے کے بعد ضلع انتظامیہ کو سخت قدم اٹھانا پڑا۔ کالا بازاری کرنے والے دکان دکانداروں کے خلاف انتظامیہ نے چھاپے ماری مہم بھی شروع کی اور دو دکانداروں کے خلاف کارروائی کرتے ہوئے 25 ہزار روپے کا جرمانہ بھی عائد کیا گیا۔
ڈی ایم بی این سنگھ نے دکانیں 6 بجے سے 11 بجے تک کھولنے کی اجازت دی ہے۔ نوٹی فکیشن میں قانون نافذ کرنے والے اداروں و اہلکاروں کو تنبیہ کی گئی ہے کہ اشیاء ضروریات سپلائی کرنے والی گاڑیوں کو بلا جواز نہ روکا جائے گا۔
ساتھ ہی ساتھ انتظامیہ نے اشیائے خوردنی کی ترسیل میں آسانی کے لئے ایسے ٹھیلوں اور رکشوں کو بھی سیکٹروں اور نویئڈا کے مختلف علاقوں میں جانے کی اجازت دے دی، جو گھوم گھوم کر اشیائے خورد ونوش، اشیاء ضروریہ سبزیاں پھل و دیگر اشیاء فروخت کرتے ہیں۔
انتظامیہ کی جانب سے اس بات کو یقینی بنانے کی ہدایت دی گئی ہے کہ سامان خریدتے وقت کسی بھی ٹھیلے یا دکان پر دو سے زیادہ لوگ ایک ساتھ اکٹھے نہ ہوں، جس سے کورونا وائرس کے پھیلاؤ پر قابو پانے میں مشکل ہو۔ اس سے یقینی طور پر عوام کو تمام اشیاء ضروریہ مناسب قیمتوں میں دستیاب ہوں گی جو انتظامیہ کے ساتھ ساتھ عوام کے لیے بھی راحت کا سبب بنے گی۔
