نوئیڈا میڈیا کلب کے زیر اہتمام سیکٹر 6 میں واقع این ڈی اے آڈیٹوریم میں ایک عظیم الشان پروگرام کا انعقاد کیا گیا۔
اس موقع پر فری اسپیچ 2019 کے فاتحین کو اعزاز سے نوازا گیا۔اس کے علاوہ پانچ صحافیوں کو صحافت میں نمایاں کردار ادا کرنے پر بھی اعزاز سے نوازا گیا۔
اس پروگرام میں بطور مہمان راجیہ سبھا ٹی وی کے ایڈیٹر اروند کمار سنگھ، بی بی سی انڈیا کے مدیر مکیش شرما، انڈیا ٹی وی کے ایگزیکٹو ایڈیٹر سوشانت سنہا شریک ہوئے۔
اس پروگرام کی صدارت نوئیڈا میڈیا کلب کے صدر پنکج پراشر اور نظامت جنرل سکریٹری ونود راجپوت نے کی۔
اس موقع پر شہر کے معززین کے ہمراہ نوئیڈا میڈیا کلب کے تمام عہدیداران موجود تھے۔
نوئیڈا میڈیا کلب کے زیر اہتمام فری اسپیچ ایوارڈ 2019 کے فاتحین کے ناموں کا اعلان کلب کے سالانہ اجلاس کے دوران کیا گیا۔
قومی سطح کے بہترین رپورٹرز اور بہترین فوٹوگرافرز کے تحت این ایم سی کے زیر اہتمام ایک مقابلہ ہوا۔ جس میں 25 اکتوبر تک ملک کے مختلف حصوں سے ڈیڑھ سو کے قریب درخواستیں موصول ہوئیں۔
کلب کے ذریعہ مدعو کردہ پانچ ممبروں کی جیوری نے 02 نومبر کو تین راؤنڈ کے دوران دونوں زمروں میں تین فاتح قرار دئیے۔
نیوز رپورٹرز کے زمرے میں اروند شکلا کو پہلا ، جے پور کے بھاسکر کے آنند چودھری کو دوسرا جبکہ مراد آباد کےجاگرن کے رتیش دویدی کو تیسری پوزیشن کے لئے منتخب کیا گیا تھا۔
دوسری جانب فوٹوگرافرز کے زمرے کے لئے جیوری نے ہندوستان ٹائمز نوئیڈا کے سنیل گھوش کو پہلی، سلمان علی ہندوستان ہندی نوئیڈا کو دوسری اور ٹائمز آف انڈیا کے ہمانشو سنگھ کو تیسری پوزیشن کے لئے منتخب کیا۔ ان فاتحین کو ہزاروں روپے بطور انعامات دیئے گئے۔
اس موقع پر راجیہ سبھا ٹی وی کے ایڈیٹر اروند کمار سنگھ نے کہا کہ صحافت کا پیشہ ایک مقدس پیشہ ہے، اس پیشہ کو متاثر کرنے کے لئے بڑی تعداد میں لوگ اس پیشہ میں آرہے ہیں، ایسے لوگوں سے باخبر رہنے کی ضرورت ہے۔
بی بی سی انڈیا کے مدیر مکیش شرما نے کہا کہ سوشل میڈیا کے اس دور میں خبروں میں جعلی الفاظ شامل ہونا شروع ہوگئے ہیں یہ تشویش کی بات ہے، سوشل میڈیا پر نظر رکھنے کی ضرورت ہے۔
اس موقع پر انڈیا ٹی وی کے ایگزیکٹو ایڈیٹر سوشانت سنہا نے کہا کہ پچھلے کچھ دنوں میں سوشل میڈیا تیزی سے ہاوی ہورہا ہے ۔سوشل میڈیا کے اثرات اب دیکھنے کو مل رہے ہیں۔
مزید پڑھیں: گجرات: سڑک حادثے میں 8 افراد ہلاک
انہوں نے کہا کہ آج ا سیاسی لوگوں پر گرفت مضبوط کرنے کے لئے ٹی وی چینل یا نیوز ایجنسی کی ضرورت نہیں ہے۔ لوگ سوشل میڈیا کے ذریعہ ان کی باتیں اچھی طرح سے کہہ رہے ہیں۔
اس موقع پر سینئر صحافی انیل چودھری، انیل نگم، ونود شرما، سریش چودھری، آدیش بھاٹی کو اس پروگرام میں صحافت میں خدمات کے اعتراف کے لئے اعزاز سے نوازا گیا، شہر کے متعدد معززین کے علاوہ کئی اداروں کے نوجوان صحافی بڑی تعداد میں موجود تھے۔
