قومی دارالحکومت دہلی سے متصل اترپردیش کے صنعتی شہر نوئیڈا میں ایک 60 سالہ بزرگ کورونا وائرس کی وجہ سے اسٹیٹ انسٹی ٹیوٹ آف میڈیکل سائنسز میں ہلاک ہوگئے۔
ذرائع کے مطابق نوئیڈا کے ایک نجی اسپتال میں کورونا کی تصدیق ہونے کے بعد رات ڈھائی بجے کرونا کے مریض کو انسٹی ٹیوٹ ریفر کردیا گیا تھا جہاں صبح 3بجے اس کی موت واقع ہو گئی۔
بتایا جارہا ہے کہ سانس کی تکلیف کے سبب انہیں نوئیڈا کے اسپتال میں داخل کرایا گیا تھا۔نوئیڈا اور گریٹر نوئیڈا میں کورونا وائرس سے متاثرہ افراد کی تعداد 202 ہے۔
ضلع میں 10 نئے معاملات میں سے 3 افراد طبی عملے سے وابستہ ہیں۔ اس سے قبل حفظان صحت کے کارکنان، صحت کے کارکنان، پولیس کے جوانوں کو بھی کورونا وائرس کے انفیکشن کا خطرہ لاحق ہو گیا ہے۔
ایک افغان طالب علم میں کورونا وائرس کی تصدیق ہونے کے بعد محکمہ صحت نے اس کے تین ساتھیوں کو بھی قرنطینہ کیا ہے۔ ان تینوں کے نمونے بھی ٹیسٹ کے لئے بھیجے گئے ہیں۔ یہ تینوں گریٹر نوئیڈا کے ایک کالج میں زیر تعلیم ہیں۔
