رات کو اے سی پی کا مختلف سیکٹر میں پیدل مارچ

نوئیڈا میں بڑھتے جرائم گراف سے جہاں عوام میں خوف و دہشت پائی جا رہی ہے وہیں پولیس اس پر قابو پانے میں کافی حد تک ناکام دکھائی دے رہی ہے۔ عوام میں اعتماد کی بحالی اور خوف کو دور کرنے کے لیے نوئیڈا کے اے سی پی سیکینڈ رجنیش ورما مع فورس رات کو پیدل ہی سڑکوں پر نکل پڑے۔

نوئیڈا کے اے سی پی رجنیش ورما نے بعض سیکٹروں کا پیدل ہی دورہ کیا اور مشتبہ افراد سے پوچھ گچھ بھی کی۔ ساتھ ہی مقامی لوگوں سے ان کی پریشانیاں جاننے کی کوشش کی اور اس کو حل کرنے کا وعدہ بھی کیا۔ پولیس کے اس اقدام سے یقینی طور پر عوام میں پیدا ہونے والی بے چینی کم ہوئی ہوگی۔

نوئیڈا پولیس نے مختلف سیکٹرز اور سوسائٹی میں سیکورٹی سے متعلق تمام مسائل کے حل کے لیے '' پولیس آپ کے دوار'' پروگرام کی شروعات کی ہے، جس میں پولیس افسران مختلف سیکٹر اور سوسائٹی کا معائنہ کر کے سیکٹر کے لوگوں کے مسائل کا حل تلاش کرنے کی کوشش کریں گے۔ رات کو اے سی پی کی سربراہی میں ہونے والا پیدل مارچ بھی اسی سلسلے کی کڑی ہے۔