تفتیش کے دوران پولیس کو معلوم ہوا کہ یہ افراد کووڈ ۔ 19 سے متاثرہ مریضوں کے لواحقین سے سوشل میڈیا کے ذریعے رابطہ کر رہے تھے اور انہیں انجیکشن زیادہ قیمت پر فروخت کر رہے تھے۔
ڈی سی پی ہریش چندر کے مطابق پولیس تھانہ فیس 2 نے ایک اطلاع کی بنیاد پر جمعرات کی سہ پہر کو نعیم ، نثار اور پرویش نامی تین افراد کو گرفتار کیا۔ انہوں نے بتایا کہ پولیس نے ان کے پاس سے 5 ریمڈیسیور انجیکشن برآمد کیا ہے۔ یہ انجیکشن کورونا وائرس سے متاثرہ مریضوں کے علاج کے لئے فائدہ مند ہے۔
انہوں نے بتایا کہ تفتیش کے دوران پولیس کو معلوم ہوا کہ گرفتار ملزمان میں نعیم گریٹر نوئیڈا کے نوین ہسپتال میں کام کرتا ہے جبکہ پرویش طبی نمائندہ (میڈیکل ریپرزینٹیٹو) ہے۔ پولیس کو اطلاع ملی کہ یہ لوگ دو ہزار روپے کی قیمت کے انجیکشن کو 30 سے 40 ہزار روپے میں فروخت کرتے تھے۔
ڈی سی پی نے بتایا کہ پولیس ان سے یہ جاننے کی کوشش کر رہی ہے کہ ان لوگوں کے پاس سے برآمد ہونے والا ریمڈیسیور انجیکشن کہاں سے ملا تھا۔ ہمیں شبہ ہے کہ میڈیکل اسٹورز کے چلانے والے اور کچھ ہسپتالوں کا عملہ بھی اس بلیک مارکیٹنگ میں ملوث ہیں۔
