کانگریس کے میڈیا اور کمیونیکیشن امور کے انچارج رندیپ سنگھ سورجیوالا نے آج مہاراشٹرا کی اپنی ہی اتحادی حکومت پر تنقید کی ہے۔ رندیپ سنگھ سورجیوالا نے مہاراشٹر میں ایس ایس سی امتحانات منعقد کئے جانے پر ٹویٹر پر لکھا کہ ”اس وقت ایس ایس سی کے امتحانات منعقد کئے جانے سے کووڈ-19 کو فروغ مل سکتا ہے”۔
ٹویٹر پر مہاراشٹر کے وزیراعلیٰ ادھو ٹھاکرے کے دفتر اور مہاراشٹر کی وزیر تعلیم ورشا گائیکوارڈ کو ٹیگ کرتے ہوئے رندیپ سنگھ سورجیوالا نے لکھا ہے کہ ایس ایس سی میں 17 لاکھ سے زائد طلبہ شامل ہو رہے ہیں، ایسے میں کورونا وائرس کے پھیلاؤ کے خدشے سے انکار نہیں کیا جا سکتا ہے۔
اس لئے وزیراعلیٰ اور وزیر تعلیم کو اس ضمن میں نوٹس لینا چاہیے اور امتحانات کو موخر کرنے کے احکامات جاری کرنا چاہئے۔
واضح ہو کہ مہاراشٹرا میں وزیر تعلیم ورشا گائیکواڈ کانگریس کے کوٹے سے ہی وزیر بنی ہیں، لیکن آج کانگریس کے میڈیا انچارج نے اپنی ہی پارٹی کی وزیرکو نشانہ بنایا ہے۔
مہاراشٹر کی وزیر تعلیم ورشا گائیکواڈ نے جمعہ کے روز اعلان کیا تھا کہ ایس ایس سی امتحانات، شیڈول کے مطابق جاری رہیں گے جبکہ اسی دن وزیراعلی ادھو ٹھاکرے نے تمام لوگوں سےگھر میں ہی رہنے کی اپیل کی تھی۔
ایس ایس سی بورڈ کے عہدیداروں کے مطابق ریاست کے 9 مراکز کے 17،6500 طلباء ہفتہ اور پیر کو بقیہ دو مضامین کےامتحانات میں شامل ہوں گے۔
